Një ekip inxhinierësh në UC Berkeley ka zhvilluar robotin më të vogël fluturues me valë në botë, të frymëzuar nga bletët. Me peshë vetëm 21 miligram dhe me diametër nën 1 centimetër, droni mund të rri pezull, të ndryshojë drejtimet dhe të godasë me saktësi objektiva të vegjël.
Aplikimi i një fushe magnetike të jashtme bën që roboti të rrotullohet, duke gjeneruar mjaftueshëm energji për të ndihmuar robotin të fluturojë. Sistemi mund të përdoret në të ardhmen për mbikëqyrje, monitorim mjedisor dhe operacione kërkim-shpëtimi.
“Ky robot fluturues mund të kontrollohet me valë për t’iu afruar dhe goditur një objektiv të caktuar, duke imituar mekanizmin e pjalmimit pasi një bletë mbledh nektar dhe fluturon larg,” tha Liëei Lin, Profesor i nderuar i Inxhinierisë Mekanike në UC Berkeley, në një deklaratë.
Ekipi i UC Berkeley e kapërceu problemet e pajisjeve elektronike dhe baterisë duke kontrolluar drejtimin e fluturimit dhe duke fuqizuar pajisjen me një fushë magnetike të jashtme. Frymëzuar nga bletët, të njohura për aftësitë e tyre të jashtëzakonshme aeronautike si fluturimi dhe pllenimi, ekipi projektoi një robot fluturues që tejkalon robotët e tjerë artificialë të ngjashëm. Roboti ka dy magnet të vegjël dhe është projektuar si një helikë e vogël. Këta magnet tërhiqen dhe zmbrapsen nga një fushë magnetike e jashtme, e cila rrotullon helikën dhe krijon fuqi të mjaftueshme për ta ngritur robotin nga toka. Duke rregulluar forcën e fushës magnetike, rruga e fluturimit të robotit mund të kontrollohet me saktësi.
Sipas ekipit, roboti tjetër me aftësi të ngjashme fluturimi është gati 3 herë më i madh se roboti i ri fluturues. “Robotët e vegjël fluturues janë të dobishëm për eksplorimin e zgavrave të vogla dhe mjediseve të tjera të komplikuara. Kjo mund të përdoret për pllenim artificial ose për të inspektuar hapësira të vogla, si pjesa e brendshme e një tubi,” tha Fanping Sui, bashkëautor i studimit në një deklaratë.
Aktualisht droni nuk mund të rregullojë lëvizjet e tij në kohë reale. Ndërsa është i aftë për fluturim të saktë, ndryshimet e papritura mjedisore si erërat e forta mund ta largojnë atë nga kursi i fluturimit. “Sipas studiuesve, ata planifikojnë të shtojnë kontrollin aktiv në të ardhmen, duke mundësuar rregullime në kohë reale të pozicionit dhe qëndrimit të tij,” tha Wei Yue, bashkëautori i parë dhe një student i diplomuar në laboratorin Liwei Lin. Robotit gjithashtu i duhet një fushë magnetike e fortë nga një spirale elektromagnetike për funksionimin. Megjithatë, zvogëlimi i mëtejshëm i madhësisë së tij nën 1 mm, afërsisht sa një mushkonjë, mund ta bëjë atë mjaft të lehtë për t’iu përgjigjur fushave më të dobëta magnetike, si ato nga valët e radios.
