Inteligjenca artificiale mund të bëhet së shpejti një nevojë e përditshme, si energjia elektrike apo uji, për të cilin përdoruesit do të paguajnë sipas konsumit. Ky është vizioni i Sam Altman, i cili paralajmëron se në të ardhmen, familjet dhe bizneset mund të kenë një “faturë AI” krahas faturave tradicionale të shërbimeve publike.
Duke folur në BlackRock Infrastructure Summit në Washington, drejtori ekzekutiv i OpenAI tha se industria po shkon drejt një modeli ku “inteligjenca shpërndahet sipas kërkesës” dhe matet përmes njësive të quajtura “tokens”. Sipas Altman, AI do të blihet dhe shitet si një nevojë e përditshme, ku përdoruesit paguajnë vetëm për atë që konsumojnë.
Por ky vizion vjen me sfida serioze. Qasja në AI, sipas Altman, do të varet drejtpërdrejt nga kapaciteti kompjuterik, infrastruktura e nevojshme për të trajnuar dhe operuar modelet e avancuara. Nëse ky kapacitet nuk rritet mjaftueshëm, çmimet mund të rriten ndjeshëm, duke e bërë AI një privilegj për të pasurit ose duke detyruar qeveritë të ndërhyjnë për shpërndarjen e burimeve.
Ndërkohë, kompanitë e mëdha teknologjike po investojnë shuma marramendëse për të përballuar kërkesën në rritje. Në CES 2026, CEO e AMD, Lisa Su, deklaroi se bota do të ketë nevojë për mbi 10 yottaflops kapacitet llogaritës në 5 vitet e ardhshme, një rritje drastike krahasuar me vitin 2022.
Sfidat energjetike po bëhen gjithashtu një pengesë kryesore. Elon Musk ka paralajmëruar se prodhimi i energjisë elektrike mund të jetë faktori kufizues për zgjerimin e AI, ndërsa brenda kompanive teknologjike, qasja në GPU po kthehet në një burim të çmuar.
Edhe vetë OpenAI, sipas presidentit Greg Brockman, pranon se pavarësisht planeve ambicioze dhe investimeve kolosale në qendra të dhënash, kërkesa për AI mund të tejkalojë gjithmonë ofertën.
