Japonia po përballet me një rritje shqetësuese të sulmeve nga arinjtë, një fenomen që vitin e kaluar çoi në numrin më të lartë të viktimave njerëzore të regjistruara ndonjëherë në vend. Kjo situatë ka shkaktuar panik në zonat e prekura dhe, në mënyrë të pazakontë, ka rritur ndjeshëm kërkesën për një zgjidhje teknologjike jo konvencionale, si një “ujk robotik”, i krijuar për t’i trembur arinjtë.
Japonia strehon mbi 50 mijë arinj në tre nga katër ishujt kryesorë. Rreth 12 mijë arinj të llojit Ussuri jetojnë në Hokkaido, ndërsa ishujt Honshu dhe Shikoku kanë mbi 45 mijë arinj të zinj, një specie unike për vendin. Marrëdhënia mes njerëzve dhe këtyre kafshëve ka qenë historikisht e tensionuar, me incidente të rënda, përfshirë një sulm famëkeq në vitin 1915 në Hokkaido, ku një ari vrau shtatë persona brenda pak ditësh.
Qeveria japoneze nisi regjistrimin zyrtar të sulmeve vetëm në vitin 2006, dhe në vitin e kaluar u shënua një rekord negativ me 13 viktima të konfirmuara dhe mbi 200 të plagosur. Disa raste ishin veçanërisht tronditëse, si një ari që hyri në një supermarket apo sulmi ndaj një vrapuesi maratone gjatë stërvitjes. Në prefekturën Akita, një nga zonat më të prekura, autoritetet shkuan deri në angazhimin e ushtrisë.
Ekspertët fajësojnë ndryshimet klimatike, të cilat kanë reduktuar burimet ushqimore, si dhe shpopullimin e zonave rurale, të banuara kryesisht nga të moshuar, duke i shtyrë arinjtë drejt vendbanimeve njerëzore. Në këtë kontekst, kompania Ohta Seiki nga Hokkaido ka parë një rritje të papritur të kërkesës për produktin e saj “Monster Wolf”, një robot me energji diellore në formë ujku, me sy LED të kuq dhe altoparlant që lëshon mbi 50 tinguj kërcënues.
Edhe pse kushton rreth $4 mijë, pajisja po shitet më shumë se kurrë, me porosi që tashmë kanë kaluar shifrat e gjithë vitit të kaluar.
