Pokémon GO u shndërrua në një fenomen global 10 vite më parë, duke “detyruar” njerëzit të dalin shëtitje vetëm për të kapur Pokémon. Me sa duket kjo nuk ishte vetëm një lojë, pasi sasia masive e të dhënave të grumbulluara po ndihmon në ndërtimin e një prej modeleve gjeohapësinore më të mëdha në botë, të aftë për të drejtuar robotë dhe sisteme të avancuara të inteligjencës artificiale.
Kjo nismë po udhëhiqet nga Niantic Spatial, një kompani e re e shkëputur nga Niantic pas shitjes së saj te Scopely vitin e kaluar. Ndryshe nga kompania mëmë, Niantic Spatial zotërohet nga investitorët origjinalë të Niantic dhe fokusohet ekskluzivisht në AI dhe modele gjeohapësinore.
Gjatë një dekade, Pokémon GO dhe lojëra të tjera si Pikmin Bloom dhe Monster Hunter Now patën qasje në kamerat e telefonave të përdoruesve gjatë lojës. Kjo qasje u përkthye në rreth 30 miliardë imazhe të mbledhura globalisht, të cilat sot përbëjnë bazën e asaj që kompania e quan “Large Geospatial Model”, një hartë digjitale me saktësi deri në disa centimetra.
Sipas CTO-së Brian McClendon, mbi 500 milionë njerëz instaluan Pokémon GO vetëm në 60 ditët e para, duke kontribuar pa ndërprerje në grumbullimin e të dhënave vizuale. Sot, kjo teknologji po përdoret përtej lojërave, përfshirë bashkëpunimin me Coco Robotics, e cila ndërton robotë shpërndarës për mjedise urbane.
CEO i Niantic Spatial, John Hanke, thotë se navigimi në qytete kaotike është një nga sfidat më të vështira për robotikën, ndërsa teknologjia e kompanisë ofron një alternativë më të besueshme se GPS-i tradicional.
Megjithatë, pas suksesit teknologjik fshihet edhe një debat etik: shumica e përdoruesve nuk ishin të vetëdijshëm se po kontribuonin në ndërtimin e një infrastrukture që sot po shitet si shërbim komercial për robotikë dhe AI.
Po ju a do të vazhdonit të luanit këtë lojë nëse do të dinit se imazhet nga kamera juaj do të përdoreshin për të stërvitur modelet e AI?
