Krahas prezantimit të smartfonit të palosshëm Find N6, Oppo ka zbuluar zyrtarisht edhe orën e re inteligjente Oppo Watch X3, e cila vjen si një evolucion i drejtpërdrejtë i Watch X2, duke sjellë përmirësime të ndjeshme në dizajn, peshë dhe funksione shëndetësore.
Watch X3 ruan formën rrethore, por ka një trup më të hollë dhe më të lehtë. Ajo është ndërtuar nga aliazh titani TC4, material i përdorur gjerësisht në industrinë ajrore dhe mjekësi për shkak të rezistencës së lartë ndaj korrozionit. Rripi i ridizajnuar përfshin të ashtuquajturat “bamboo joints”, lidhëse metalike mes segmenteve të rripave, që i japin orës një ndjesi më premium. Ekrani mbrohet nga xham safiri dhe është një panel 1.5 inç LTPO OLED me rezolucion 466 x 466 pikselë, por tashmë 36% më i ndritshëm, duke arritur deri në 3,000 nits.
Falë optimizimit të strukturës, ora është 16% më e lehtë dhe 6.4% më e hollë se paraardhësja, pa sakrifikuar baterinë. Kapaciteti prej 646mAh ofron deri në 3 ditë përdorim intensiv, 5 ditë përdorim normal dhe deri në 16 ditë në modalitet kursimi. Karikimi i shpejtë lejon 24 orë përdorim me vetëm 10 minuta karikim.
Në aspektin e rezistencës, Watch X3 ka certifikime 5ATM, IP68 dhe IP69, duke e bërë të përshtatshme për kushte ekstreme. Risia kryesore është integrimi i monitorimit të vazhdueshëm të glukozës, së bashku me monitorimin e presionit të gjakut dhe vlerësimin e rrezikut për hipertension. Këto plotësojnë funksionet ekzistuese si ECG, oksigjeni në gjak, monitorimi i gjumit dhe temperatura e kyçit.
Ora mbështet mbi 100 aktivitete sportive, GPS me shumë sisteme dhe lidhje 4G, Wi-Fi, Bluetooth 5.2 dhe NFC. Ajo fuqizohet nga procesori Snapdragon W5. Aktualisht është në paraporosi në Kinë, ndërsa detajet për lançimin global priten së shpejti.
