Startup-i i ri i teknologjisë OMOWAY ka prezantuar zyrtarisht motorin e tij elektrik OMO X, duke pretenduar se ka zgjidhur një nga problemet më të vjetra të mjeteve me dy rrota: ruajtjen e ekuilibrit. Sipas kompanisë, bëhet fjalë për motorin e parë elektrik vetë-balancues që hyn në prodhim masiv, një hap i rëndësishëm për të ardhmen e transportit urban dhe personal.
Në qendër të këtij inovacioni qëndron arkitektura “OMO-ROBOT”, një sistem i integruar që kombinon sensorë, softuer dhe pajisje harduerike për ta kthyer motorin në një lloj “roboti me dy rrota”. Ky sistem përdor perceptim vizual, përpunim të shpejtë të të dhënave dhe teknologji fizike stabilizimi për të mbajtur motorin në këmbë, edhe pa ndërhyrjen e vazhdueshme të drejtuesit.
Elementi kyç që e bën të mundur këtë funksion është Control Moment Gyroscope (CMG), një pajisje stabilizimi me precizion të lartë, e përdorur zakonisht në satelitë dhe anije kozmike. Duke menaxhuar në mënyrë aktive momentin këndor, kjo teknologji i lejon motorit të ruajë ekuilibrin edhe në shpejtësi shumë të ulëta apo kur është i ndalur plotësisht.
Në praktikë, kjo mund të lehtësojë ndjeshëm drejtimin për fillestarët dhe për drejtuesit që hasin vështirësi me motorë të rëndë. Përveç balancimit, OMO X ofron edhe sisteme të avancuara sigurie aktive, si parandalimi i rrëshqitjes në sipërfaqe të lagështa, asistenca në kthesa dhe shmangia emergjente e pengesave, të gjitha të bazuara në analizë të menjëhershme të mjedisit.
Modeli ka fituar tashmë një iF Design Award për vitin 2026, ndërsa debutimi tregtar do të nisë fillimisht në Indonezi, me prezantimin zyrtar në Jakarta. Çmimi dhe specifikat e plota pritet të zbulohen më afër lançimit. Paralelisht, kompania ka prezantuar edhe “Mobility One”,një platformë robotike me rrota që mund të përdoret në logjistikë dhe shërbime, duke zgjeruar më tej vizionin e saj për autonominë dhe balancimin inteligjent.
