Për të bërë sa më të qartë përdorimin e shërbimeve publike në portalin qeveritar e-Albania, është prezantuar Asistenti Virtual 1.0 i cili është i fuqizuar nga inteligjenca artificiale. I pranishëm në eventin e prezantimit ishte dhe kryeministri Edi Rama, i cili tregoi se aksesimi i shërbimeve online do të jetë më i thjeshtë dhe më i shpejtë për të gjithë qytetarët.
Sikundër e kemi lajmëruar më parë, në vigjilje të vitit të ri do të vëmë në dispozicion të qytetarëve shërbëtorin e secilit, një shërbëtor publik, një asistent, i cili do të jetë në dispozicion në çdo orë të ditës dhe të natës, pavarësisht ditëve të punës apo pushimit, për t’i ndihmuar qytetarët që në ndërveprimin me e-Albania të marrin shërbimet e tyre pa pasur nevojë për ndihmë tjetër.”
Edi Rama
Kryeministri shtoi gjithashtu se për momentin ky shërbim ofrohet vetëm nëpërmjet ndërveprimit me shkrim, por brenda vitit 2024 do të vijë versioni 2.0 i Asistentit Virtual, që do të bëje të mundur kërkimin e shërbimeve përmes zërit dhe figurës. Drejtuesi i këtij projekti, siç u prezantua dhe nga Rama, është Enio Kaso i cili ka mbaruar studimet për AI në King’s College në Londër.
Drejtoresha e AKSHI, Mirlinda Karçanaj tregoi se në krijimin e këtij asistenti virtual ka patur një bashkëpunim me gjigandin e teknologjisë Microsoft, praktikisht me shërbimin Azure OpenAI që do të mundësojë përgjigje të shpejta dhe shumë të qarta.
Për shkak të interesimit të madh që pritet të ketë gjatë ditëve të para të këtij shërbimi, ajo shtoi se përdoruesit do të kenë një numër të limituar pyetjesh që mund të bëjnë, në mënyrë që shërbimi të aksesohet nga të gjithë. Gjithashtu njoftohet se është hartuar strategjia kombëtare e inteligjencës artificiale 2024-2030 si dhe do të miratohen rregullat e përdorimit etik dhe të sigurt të kësaj teknologjie.
