Përdorimi i inteligjencës artificiale nga popullata e përgjithshme në vendet e zhvilluara si SHBA në një shkallë “të konsiderueshme” do të fillojë të arrihet në 18 deri në 24 muajt e ardhshëm, sipas bashkëthemeluesit dhe filantropit të Microsoft Bill Gates.
Ndikimi në gjëra të tilla si produktiviteti dhe inovacioni mund të jetë i paprecedentë, thotë Gates. “Inteligjenca artificiale është gati të përshpejtojë shkallën e zbulimeve të reja me një ritëm që nuk e kemi parë kurrë më parë”, shkroi ai në blogun e tij. “Një prioritet kyç i Fondacionit Gates në AI është të sigurojë që këto mjete të adresojnë gjithashtu çështje shëndetësore që prekin në mënyrë disproporcionale më të varfërit në botë, si SIDA, Tuberkulozi dhe malaria,” shkroi Gates.
Ai citon aplikime të shumta të AI në sektorë të ndryshëm, ndërsa vë në dukje se zbatimi praktik do të vijë jo këtë vit, por në vitet e fundit të kësaj dekade. “Puna që do të bëhet gjatë vitit të ardhshëm do të përgatisë skenën për një bum masiv teknologjik që do të vijë më vonë në këtë dekadë.“
Shembuj të AI që po zhvillohet për përdorim në edukim apo luftimin e sëmundjeve të cituar nga Gates në letrën e tij përfshijnë:
- Luftimi i rezistencës ndaj antibiotikëve – Një studiues në Institutin Aurum në Ganë në Afrikë është duke punuar në një software që do të japë një sërë informacionesh në lidhje me guidelines të mjekimit dhe të bëjë sugjerime për ilaçin, dozën dhe kohëzgjatjen më të përshtatshme.
- Edukimi i personalizuar i drejtuar nga AI, si “Somanasi” – Një program mësimor i bazuar në AI që “është projektuar duke pasur parasysh kontekstin kulturor në mënyrë që t’i përshtatet studentëve që e përdorin atë.”
- Ulja e rreziqeve gjatë shtatzënive, duke pasur parasysh se “një grua vdes në lindje çdo dy minuta” mesatarisht në të gjithë globin.
- Një chatbot për vlerësimin e rrezikut të HIV që “vepron si një këshillues i paanshëm dhe jogjykues, i cili mund të japë këshilla gjatë gjithë kohës“, veçanërisht për “popullatat vulnerabël“.
- Një aplikacion i kontrolluar nga zëri për punonjësit e shëndetësisë në Pakistan që i lejon ata të plotësojnë një kartelë mjekësore vetëm duke folur kur vizitojnë një pacient në terren, në mënyrë që të pakësohet numri i pacientëve pa një histori mjekësore të dokumentuar.
