Në jetën tonë të përditshme na ndodh të bëjmë shaka me miqtë tonë, dhe në vend të fjalës mendjelehtë përdorim togfjalëshin “trupeshk”. Megjithatë shkencëtarët kanë zbuluar në studimin e fundit se peshqit kanë më tepër aftësi njohëse se sa mendohej.
Profesor Culum Brown, një ekspert në njohjen e peshqve nga Universiteti Macquarie në Sidnei, argumenton se peshqit e kuq dhe pothuajse të gjithë peshqit e tjerë, kanë një memorie mjaft të mirë kur vjen puna tek vendet dhe identitifikimi i miqve të tyre. Në një seri provash, profesori Brown zbuloi se peshqit ishin në gjendje të mbanin mend një shteg edhe pas një viti. Profesor Brown tha për programin Naturebang të BBC Radio 4: “Unë guxoj të them se çdo kafshë që nuk e ka atë lloj kapaciteti, peshk apo tjetër, nuk do të jetojë shumë në botën reale“.
Peshqit e kuq shpesh vihen në lojë për kujtesën e tyre të dobët, por profesori Brown thotë se realiteti është shumë ndryshe. Nëse kjo do të ishte e vërtetë, peshqit nuk do të ishin në gjendje të mësonin ndonjë sjellje të re ose të mësonin se si të përshtateshin me ndryshimet në mjedisin e tyre. Por pavarësisht se sa i zakonshëm mund të jetë ky besim, shkencëtarët e kanë ditur prej vitesh se peshqit kanë aftësi mbresëlënëse të të mësuarit.
Për të theksuar këtë pikë, profesori Brown krijoi një eksperiment për të demonstruar se si peshqit mësojnë të shpëtojnë nga rrjetat e anijeve të peshkimit.
Ai vendosi peshqit ylber në një rezervuar me një model në miniaturë të një rrjete peshkatore në të cilën kishte prerë një vrimë të vetme për të vepruar si një rrugë shpëtimi. Ndërsa e përsëriti disa herë eksperimentin, ai vuri re se peshku u bë më i shpejtë në gjetjen e vrimës së shpëtimit.
Profesor Brown thotë: ‘Në fund të katër ose pesë provave, ata arritën të notonin të qetë para rrjetës dhe gjenin menjëherë pozicionin e vrimës. Dhe unë u habita, mendoja se kjo është e pabesueshme.”
