Ndryshe nga disa kafshë si peshkaqenët dhe elefantët që rrisin dhëmbë të rinj gjatë gjithë jetës, njerëzit nuk e kanë një aftësi të tillë pas daljes së dhëmbëve të përhershëm. Mbushjet e dobësojnë strukturën e dhëmbit me kalimin e kohës, ndërsa implantet përfshijnë procedura invazive dhe materiale artificiale, që shpesh çojnë në komplikacione.
Megjithatë, duket se në të ardhmen gjithçka do të bëhet më e lehtë falë dhëmbëve që rriten në laborator, të zhvilluara nga qelizat e vetë pacientit. Pas krijimit të tyre në laborator, mund të integrohen natyrshëm në nofull, të rigjenerohen si dhëmbë të vërtetë dhe të shmangin rrezikun e refuzimit.
Në King’s College London, studiuesit kanë kaluar mbi një dekadë duke studiuar se si të rrisin dhëmbë në laborator. Nën drejtimin e Xuechen Zhang nga Fakulteti i Stomatologjisë, studimi i fundit në bashkëpunim me Imperial College London, arriti një zbulim të madh: krijimin e një materiali të veçantë që lejon qelizat të komunikojnë natyrshëm mes tyre. Ky komunikim imiton zhvillimin natyror të dhëmbëve, duke kapërcyer sfidat e mëparshme ku sinjalet çliroheshin të gjitha menjëherë, në vend që të lëshoheshin gradualisht.
Tani që kanë arritur të krijojnë mjedisin e nevojshëm për rritjen e dhëmbëve, hapi tjetër është transferimi i tyre te pacientët. Studiuesit po shqyrtojnë dy opsione: transplantimin e qelizave të reja të dhëmbit direkt në gojë ose rritjen e një dhëmbi të plotë në laborator para implantimit. Të dyja qasjet kërkojnë nisjen e procesit të zhvillimit të hershëm të dhëmbit në laborator.
Ky projekt është pjesë e një lëvizjeje më të gjerë në mjekësinë rigjenerative, që synon të riparojë ose zëvendësojë pjesë të dëmtuara të trupit duke përdorur metoda biologjike në vend të materialeve artificiale. Dr. Ana Angelova Volponi, autore korresponduese, theksoi se kjo punë novatore mund të revolucionarizojë kujdesin dentar, duke ofruar zgjidhje më të qëndrueshme dhe efektive për riparimin e dhëmbëve.
