Që të gjithë e dimë se Toka është e rrumbullakët, por shkencëtarët tani tregojnë se planeti ynë mund të mos ketë qenë gjithmonë në këtë formë. Në fakt, në vend të formës që e njohim si elipsoide, shkencëtarët mendojnë se Toka ishte më e sheshtë në momentet të hershme të jetës së saj.
Shkencëtarët më parë supozonin se ‘protoplanetët’ – planetë shumë të rinj që janë formuar së fundmi rreth yjeve – kishin formë sferike. Për të vënë në provë këtë supozim, studiuesit nga universiteti i Central Lancashire simuluan mënyrën se si planetët mund të formohen nga disqet e gazit rreth yjeve.
Kjo zbuloi se, në vend që të jenë të rrumbullakët, planetët e sapoformuar janë në fakt shumë më të shtypur. Dr Dimitris Stamatellos, bashkautor i punimit, thotë: “Ne ishim shumë të befasuar që ata rezultuan të ishin sferoidë të shtypur, mjaft të ngjashëm me një M&M’s! Ne kemi studiuar formimin e planetit për një kohë të gjatë, por kurrë më parë nuk kemi menduar të kontrollojmë formën e planetëve ndërkohë që formohen në simulime. Ne gjithmonë kishim supozuar se ato ishin sferike.”
Shumica e planetëve që mund të vëzhgojmë janë sferike, ose të paktën janë shumë afër të qenit sfera. Toka është rrafshuar në polet e saj me rreth 0.3%, Jupiteri me rreth 6% dhe Saturni me 10%. Por shkencëtarët tani besojnë se protoplanetët janë të rrafshuar me rreth 90%.
Kjo fazë e protoplanetëve mendohet se zgjat midis 1-5 milionë viteve të para të ekzistencës së një planeti. Duke marrë parasysh se Toka është rreth 4.5 miliardë vjet e vjetër, ajo do të kishte qenë në formën e karameleve M&M’s për një pjesë shumë të vogël të historisë së saj të hershme.
