Florida do të bëhet shteti i parë që do ta konsiderojë një krim përndjekjen e personave përmes pajisjeve GPS. Ligjvënësit republikanë propozuan një projekt-ligj të ri që do të parashikonte deri në pesë vjet burg dhe një gjobë prej $5,000 për shkelësit e kapur duke përdorur sisteme gjurmimi si AirTags të Apple dhe spyware për të ndjekur viktimat pa pëlqimin e tyre.
Aktualisht përndjekja përmes këtyre pajisjeve është një shkelje e shkallës së dytë, e cila parashikon një dënim deri në 60 ditë heqje lirie dhe një gjobë prej $500. Komiteti Gjyqësor i Floridës e miratoi projektligjin të hënën me 9 vota pro dhe asnjë kundër, por ai duhet të kalojë në Komisionin e Rregullave të Senatit përpara se të shkojë në Dhomën e Përfaqësuesve dhe Senatit. Nëse miratohet, guvernatori Ron DeSantis mund ta nënshkruajë atë në ligj më 1 tetor.
Projektligji u propozua nga përfaqësuesi Tobin Overdorf dhe senatori John Martin, të cilëve iu kërkua nga departamentet e policisë të prezantonin këtë projektligj. Martin tregoi se ligji duhet të ndryshohet sepse “është shumë më e lehtë tani të gjurmosh individët përmes AirTags, aplikacioneve dhe pajisjeve të tjera“. Ai shtoi se disponueshmëria në rritje e gjurmuesve do të thotë se teknologjia ‘mund të mos zbulohet nëse nuk jeni të trajnuar ose të aftë për të gjetur ato pajisje gjurmuese’.
Projektligji thotë se ka përjashtime që lejojnë individë të caktuar të gjurmojnë të tjerët pa pëlqimin e tyre, duke përfshirë zbatimin e ligjit, një prind ose kujdestar ligjor të një të mituri, një kujdestar për një të moshuar ose person me aftësi të kufizuara dhe pronarin ose qiramarrësin e një automjeti.
Qëllimi është të parandalohen disa krime, si përshembull ai i vitit 2022 ku një grua përdori një Apple AirTag për të gjurmuar të dashurin e saj në një bar ku e vrau brutalisht duke e shtypur me makinën e saj.
