Bateritë që përdorin ujin si elektrolit janë një hap më afër një prezantimi komercial, falë një dizajni të ri që zgjat në mënyrë drastike jetëgjatësinë e tyre. Një aplikim i mundshëm i këtyre baterive mund të jetë në skuterët elektrik, thonë studiuesit.
Bateritë lithium-ion, të cilat aktualisht përdoren në pothuajse çdo pajisje, që nga telefonat inteligjentë te makinat elektrike, ofrojnë shumë përfitime të tilla si një densitet i lartë energjie, por gjithashtu bartin rrezikun e shpërthimit në flakë kur kanë probleme sepse përdorin tretës të rrezikshëm organikë si elektrolitet e kombinuara me anodë litiumi.
Prandaj, ekipet në mbarë botën po punojnë për të zhvilluar teknologji që do të zëvëndësojë bateritë lithium-ion. “Strategjia jonë është të zëvendësojmë elektrolitet organike që përdoren aktualisht në bateritë litium-jon me një elektrolit uji,” thotë Tianyi Ma në Universitetin RMIT në Melburn, Australi.
Nuk është e mundur që thjesht të vendosni ujë në një bateri litium-jon sepse uji dhe litiumi janë shumë shpërthyes nëse kombinohen. Në vend të kësaj, bateritë e ekipit përdorin një përzierje uji dhe kripërash inorganike si elektrolit dhe zinkut si anodë. Megjithatë, një problem kryesor me bateritë e ujit ka qenë rritja e strukturave metalike me gjemba, të quajtura dendrite, në anodat e zinkut.
Këto reduktojnë në mënyrë dramatike jetëgjatësinë e baterisë dhe çojnë në qarqe të shkurtra dhe probleme të tjera teknike. Për të adresuar këtë, ekipi ka zhvilluar një proces të ri në të cilin anoda dhe katoda e baterisë janë të veshura me një përbërje metalike të quajtur oksid bismuti. Bateritë e mëparshme të ujit do të humbnin gjysmën e kapacitetit të tyre pas 500 cikleve të karikimit, por Ma thotë se bateritë e reja humbasin vetëm 15% në të njejtën kohë.
Megjithatë, bateritë nuk janë plotësisht të gatshme për të fuqizuar një makinë, thotë ai, madje edhe prototipet e tyre më të mira kanë vetëm 30% të densitetit të energjisë së një baterie të përdorur në automjetet elektrike Tesla. Por Ma thotë se është pothuajse i sigurt se, duke pasur parasysh ritmin e përparimit me bateritë e ujit në vitet e fundit, ato përfundimisht do të arrijnë të barazohen me versionet litium-jon.
Në fakt, ai beson se bateritë e tyre të fundit të ujit mund të përdoren në skuterët e sotshëm, pasi këto pajisje nuk kanë nevojë për sasi të mëdha energjie.
