Shkencëtarët e Cornell University kanë krijuar materialin tekstil më të zi të prodhuar ndonjëherë, që përthith 99.87% të dritës dhe reflekton vetëm 0.13%. Ky nivel e afron materialin me efektin e një “vrime të zezë” të vërtetë dhe hap rrugën për përdorime nga moda te teknologjitë e avancuara optike.
Pëlhura u krijua duke lyer lesh merino të bardhë me polidopaminë, një pigment sintetik që imiton melaninën. Më pas, materiali u vendos në një dhomë plazme për të krijuar nanofibrila, struktura mikroskopike me majë të imëta që bllokojnë dhe përthithin dritën. Ky kombinim e çoi reflektimin total në vetëm 0.13%, duke e bërë këtë pëlhurë materialin tekstil më të errët të raportuar deri më sot. Ajo ruan ngjyrën ultra të zezë edhe në kënde të gjera shikimi deri në 120 gradë, një performancë më e mirë se materialet e ngjashme komerciale.
Studimi u frymëzua nga shpendi Ptiloris magnificus, që ka pupla tepër të zeza falë melaninës dhe strukturave mikroskopike që përthithin dritë. Ashtu si tek zogu, polidopamina krijon pigmentimin bazë, ndërsa nanofibrilat shtojnë mekanizmin natyror të “përthithjes së dritës”.
Materiali është i qëndrueshëm dhe i veshshëm, ndryshe nga teknologjitë shumë të errëta të deritanishme, të cilat shpesh janë të ngurta ose jo të përshtatshme për veshje. Studentja e Cornell, Zoe Alvarez, krijoi një fustan të zi të frymëzuar nga riflebird, ku kontrasti me ngjyrën blu mbeti i pandryshuar edhe kur imazhet u manipulonin për ndriçim e ngjyrës.
Përtej modës, materiali ka aplikime të fuqishme: në panele diellore, kamera me saktësi të lartë, teleskopë dhe kamuflazh termik, falë aftësisë për të kthyer dritën e përthithur në energji termike.
Megjithatë, titullin absolut të produktit më të errët të prodhuar e mban Vantablack i MIT, një veshje me nanotuba karboni që thith të paktën 99.995% të dritës. Por ndryshe nga ai, pëlhura e Cornell është e ajrosshme, fleksibël dhe e projektuar enkas për përdorim të përditshëm, duke e bërë më të përshtatshëm për aplikime në industrinë e modës.
