Njësia monitoruese e ndryshimeve klimatike në Bashkimin Evropian ka paralajmëruar se viti 2023 mund të jetë viti me temperaturat më të larta, pasi temperatura mesatare globale e ka kaluar kufirin e rritjes prej 1.5°C gjatë muajit qershor.
“Në planetin tonë sapo janë regjistruar temperaturat më të larta ndonjëherë për muajin qershor, pas muajit maj që ishte më pak se 0.1°C më i ftohtë se temperaturat rekord të regjistruara në muajin maj. Monitorimi i klimës sonë është më i rëndësishëm se kurrë për të përcaktuar se sa shpesh dhe për sa kohë temperaturat globale kalojnë limitin prej 1.5°C.” tha Samantha Burgess, drejtuese e C3S.
Duhet të kujtojmë që në marrëveshjen e Parisit mbi ndryshimet klimatike u shtrua plani për limitimin e ngrohjes globale nën 2°C, ndërkohë që niveli optimal do të jetë limitimi i rritjes së temperaturës deri në 1.5°C.
Organizata Botërore Meteorologjike publikoi një raport në maj 2023, në të cilin tregohej se temperaturat globale do të arrijnë rekorde të reja në pesë vitet e ardhshme. Në të tregohej në mënyrë kategorike se ekziston një probabilitet 66% që temperatura mesatare vjetore globale midis 2023 dhe 2027 të jetë mbi 1.5 ° C për të paktën një vit.
Raporti më tej tregon se ekziston një probabilitet 98% që të paktën një nga pesë vitet e ardhshme, dhe periudha pesëvjeçare në tërësi, të jetë më i ngrohti i regjistruar. Periudha e ngrohtë në fillim të qershorit 2023 është një përjashtim. C3S parashikon se për sa kohë El Niño është present, ekziston mundësia që temperaturat mesatare globale të tejkalojnë nivelin prej 1.5°C. El Nino i referohet një ngrohjeje jonormale të ujërave sipërfaqësore në Oqeanin Paqësor ekuatorial.
