Një studim i ri ka zbuluar se gratë mbartin një rrezik më të lartë gjenetik për depresion sesa burrat. Kërkimi, i publikuar në revistën Nature Communications, konsiderohet si më i madhi deri tani që analizon ndryshimet gjinore në depresionin madhor. Studiuesit nga Instituti Australian QIMR Berghofer identifikuan 16 variante gjenetike të lidhura me depresionin tek gratë dhe 8 tek burrat.
Sipas Dr. Brittany Mitchell, bashkautore e studimit, “gratë kanë dy herë më shumë gjasa të vuajnë nga depresioni gjatë jetës së tyre se burrat”. Ajo shtoi se deri tani kishte pak kërkime të qëndrueshme që të shpjegonin pse depresioni manifestohet ndryshe te secili seks, përfshirë rolin e mundshëm të faktorëve gjenetikë.
Analizat treguan se shumë prej varianteve gjenetike janë të përbashkëta mes gjinive, por gratë mbartin një ngarkesë më të madhe të rrezikut gjenetik, ndoshta për shkak të varianteve specifike femërore. Gjithashtu, u gjetën korelacione më të forta mes depresionit dhe çrregullimeve metabolike – si ndryshimet e peshës apo energjisë – tek gratë sesa tek burrat.
Studimi analizoi mostra ADN-je nga pesë grupe ndërkombëtare (Australi, Holanda, SHBA dhe dy nga Mbretëria e Bashkuar), përfshirë mbi 130 mijë gra dhe 64 mijë burra me depresion, si dhe më shumë se 290 mijë persona pa diagnozë.
Profesor Philip Mitchell nga Universiteti i New South Wales, i cili nuk mori pjesë në studim, e quajti kërkimin “një provë të fortë se diferencat gjinore në depresion mund të kenë bazë biologjike, jo vetëm shoqërore”. Ai shtoi se këto gjetje hapin rrugën për trajtime të personalizuara për burrat dhe gratë, bazuar në ndryshimet e tyre gjenetike.
Megjithëse autorët pranojnë se kampioni përfshinte kryesisht individë me origjinë evropiane, studimi konsiderohet një hap i rëndësishëm drejt kuptimit të bazës biologjike të depresionit dhe mënyrës se si ndikon ndryshe te gratë dhe burrat.
