Agjencia franceze e shëndetësisë ka paralajmëruar se disa medikamente që përdorim zakonisht për të trajtuar simptomat e gripit nuk duhet të përdoren për shkak të efekteve anësore potencialisht të rënda.
Farmacistët dhe mjekët janë paralajmëruar kundër dhënies së recetave për këto ilaçe nga autoriteti për sigurinë e barnave ANSM (l’Agence Nationale de sécurité du médicament et des produits de santé). Ky alarm ishte ngritur dhe më parë, por tani është përsëritur e njëjta këshillë pas shqetësimeve se njerëzit mund t’i përdorin ende ato.
Ilaçet – në raste shumë të rralla – mund të shkaktojnë efekte anësore serioze që janë më të këqija se gripi ose ftohja fillestare. Kjo përshkruhet si një ‘raport i pamjaftueshëm përfitim-risk’. Ilaçet konsiderohen tashmë të dëmshme për njerëzit me hipertension, diabet, një histori goditjeje ose konvulsioni, probleme të zemrës, hipertiroidizëm, glaukoma dhe shtatzëni. “Infarkti dhe goditjet në tru mund të ndodhin pas përdorimit të tyre”, tha drejtoresha e ANSM, Christelle Ratignier-Carbonneil për Le Parisien. “Rreziku është shumë i ulët, por këto ngjarje shumë serioze mund të ndodhin pavarësisht nga doza dhe kohëzgjatja e trajtimit. Dua t’u them të gjithëve në Francë: Mos i përdorni më.”
Këto efekte anësore të rënda mund të ndodhin sepse pseudoefedrina ka efekt “vazokonstriktor” duke bërë që enët e gjakut të trupit tuaj të ngushtohen. Kjo ndalon rrjedhjen e hundës, pasi shkaktohet nga zgjerimi i enëve të gjakut për të lejuar qarkullimin e më shumë qelizave të bardha të gjakut të sistemit tuaj imunitar. Por ilaçet nuk ngushtojnë vetëm enët e gjakut në hundë; ky efekt ndodh në të gjithë trupin. Nëse tashmë keni një problem me zemrën, ky ngushtim ekstra mund të shkaktojë një bllokim total dhe të çojë në një atak në zemër ose goditje në tru.
