Parlamenti Europian ka votuar për ndalimin e përdorimit të termave si “burger” apo “biftek” për produktet me bazë bimore, duke ndezur një debat të gjerë mes mbështetësve të industrisë tradicionale të mishit dhe prodhuesve të ushqimeve vegane. Me 355 vota pro dhe 247 kundër, propozimi shihet si një fitore për fermerët e bagëtive, të cilët prej kohësh kanë argumentuar se përdorimi i këtyre etiketave rrezikon industrinë e tyre dhe mashtron konsumatorët.
Megjithatë, ndalimi nuk është ende përfundimtar. Propozimi duhet të marrë miratimin e Komisionit Europian dhe të 27 qeverive anëtare të BE-së për t’u kthyer në ligj. Sipas eurodeputetes franceze Céline Imart, që udhëhoqi nismën, “produktet me bazë bimore nuk duhet të përdorin etiketa të mishit, sepse kjo është mashtruese për konsumatorin.”
Kjo ndjek shembullin e mëparshëm të BE-së për produktet e qumështit, ku emërtimet “qumesht”, “kos” dhe “djathë” lejohen vetëm për prodhime nga sekrecioni natyral i gjirit, duke detyruar tregun të përdorë terma si “pije tërshëre” në vend të “qumësht tërshëre”.
Kundërshtuesit e vendimit e kanë quajtur nismën “të padobishme” dhe një devijim nga prioritetet mjedisore. “Ndërsa bota digjet, Parlamenti po merret me sallame,” tha eurodeputetja gjermane Anna Cavazzini.
Industria gjermane e ushqimeve me bazë bimore – përfshirë Aldi, Lidl, Burger King dhe Rügenwalder Mühle – ka reaguar ashpër, duke paralajmëruar se ndalimi do ta bëjë më të vështirë për konsumatorët të zgjedhin ushqime alternative. Megjithatë, kancelari gjerman Friedrich Merz e ka mbështetur fuqishëm nismën, duke deklaruar: “Një sallam është sallam. Sallami nuk është vegan.”
Një propozim i ngjashëm ishte diskutuar në vitin 2020, por atëherë nuk u miratua. Këtë herë, megjithatë, mundësia për ta bërë ligj duket më e afërt se kurrë.
