Debati mbi ndotjen e oqeaneve nga materialet plastike ka marrë një kthesë të pazakontë. Prej vitesh, plastika në dete shihet vetëm si një kërcënim serioz për jetën detare, ndaj pastrimi masiv është konsideruar zgjidhja e vetme. Megjithatë, disa shkencëtarë po sugjerojnë një qasje më të kujdesshme, madje ndoshta duhet të ndalojmë përkohësisht pastrimin e plastikës në oqean.
Një nga zërat më të spikatur në këtë debat është biologia detare Rebecca Helm, aktualisht në Georgetown University. Ajo dhe kolegë të tjerë kanë vërejtur se disa organizma detarë janë përshtatur me plastikën, duke e përdorur atë si habitat. Këto organizma, të njohur si neuston, jetojnë në sipërfaqen e oqeanit dhe luajnë role kyçe në zinxhirët ushqimorë, shkëmbimin e gazeve dhe riciklimin e lëndës organike.
Sipas studiuesve, pastrimi i pakujdesshëm i plastikës mund të zhdukë pa dashje ekosisteme të tëra që ende nuk janë studiuar mirë. Gjetjet e tyre u bënë të njohura për publikun e gjerë edhe në revistën Nature.
Një shembull i rëndësishëm është Great Pacific Garbage Patch, zona gjigante ku grumbullohen miliona tonë mbetjesh plastike. Edhe pse kjo zonë është simbol i ndotjes, disa forma jete duket se kanë filluar të lulëzojnë aty.
Shkencëtarët theksojnë se kjo nuk do të thotë të braktiset lufta kundër ndotjes plastike, por të veprohet me më shumë dije dhe kujdes.
