Është përfolur shpesh se më vonë përgjatë këtij viti Samsung do të lançojë 3 smartphone high-end. 2 ndër to janë Samsung Galaxy Z Flip 5 dhe Z Fold 5. Pajisja e 3-të besohej të ishte Samsung Galaxy S23 FE, mirëpo raportimet e fundit tregojnë se kompania po përgatitet të prezantojë një pajisje të re të palosshme që vjen me një format të ri.
Leaker-i i besueshëm Yogesh Brar tregon se Samsung nuk do të lançojë Galaxy S23 FE këtë vit, prandaj mendohet se pajisja e 3-të do të jetë e palosshme e përbërë nga 3 ekrane që palosen njëra me tjetrën. Ende nuk ka shumë informacione mbi këtë pajisje, mirëpo ne kemi parë disa vite më parë nga konceptet e kompanisë disa forma të reja të pajisjeve të palosshme, duke e shndërruar një smartphone kompakt në një tablet me ekran të madh.
Samsung Display mund të ketë zhvilluar një version të përmirësuar të paneleve të palosshme që mund të përdoren për të palosur pajisjen 2 herë, megjithatë klientët mund të jenë të shqetësuar rreth qëndrueshmërisë së saj.
Galaxy Z Flip 5 dhe Z Fold 5 pritet të përdorin një version të përmirësuar të mekanizmit mbyllës, duke e bërë vijën e palosjes akoma dhe më pak të dukshme si dhe duke lejuar një puthitje të plotë të 2 gjysmave të ekraneve.