OnePlus 11 ka nisur ditën e sotme udhëtimin e tij global, pasi është prezantuar në tregun ndërkombëtar. Në tregun e Kinës ky smartphone është prezantuar që në datën 4 janar.
Ky smartphone vjen me një ekran 6.7” Fluid AMOLED LTPO3 dhe refresh rate 120Hz. Ekrani mund të arrijë ndriçimin maksimal 1300 nits. Në këndin e sipërm të majtë të ekranit gjendet gjithashtu një hole punch ku është vendosur kamera selfie 16MP.
Në pjesën e pasme gjendet ishulli i përbërë nga 3 kamera, ajo kryesore 50MP (Sony IMX890), ultrawide 115 gradë 48MP që ka dhe aftësi macro, si dhe kamera telephoto 2x 32MP. Kjo është gjenerata e 3-të e kamerave në smartphone-t OnePlus që janë zhvilluar në bashkëpunim me Hasselblad. Ky bashkëpunim sjell shërbimin Natural Color Calibration, Hasselblad Portrait Mode si dhe TurboRAW HDR.
Snapdragon 8 Gen 2 është proçesori i cili do të fuqizojë këtë pajisje, i cili do të shoqërohet nga 8GB ose 16GB RAM si dhe memorie të brendshme 128GB ose 256GB respektivisht.
Bateria ka kapacitet 5,000mAh dhe suporton karikimin super të shpejtë 100W përmes karikueses SUPERVOOC. Mirëpo për fat të keq kjo pajisje nuk vjen me aftësinë për t’u karikuar wireless.
OnePlus tregon se ky smartphone do të jetë produkti i parë i kompanisë që do të mbështetet me deri në 4 rifreskime madhore të OxygenOS si dhe 5 vite rifreskime sigurie.
OnePlus 11 do të vijë në ngjyrat Titan Black dhe Eternal Green, ndërkohë që puna e çmimeve është paksa e ndërlikuar. Varianti 8/128GB do të kushtojë $699 në SHBA, ndërkohë që në Europë do të kushtojë €829. Nga ana tjetër varianti 16/256 do të kushtojë $799/€899.
A ju duket e arsyeshme një diferencë kaq e madhe në çmime midis dy kontinenteve?
article by: Endri Dano
