Është koha për smartphone të rinj! Ne në Geek Room jemi shumë të kënaqur të lajmërojmë se së bashku me Neptun do të jemi prezent në një ndër eventet më të mëdha të teknologjisë për smartphone, Mobile World Congress 2024 gjatë datave 27-28-29 shkurt në Barcelonë.
Në ekspozitë, do të kemi mundësinë të shikojmë nga afër një sërë kompanish të ndryshme që do të shpalosin teknologjitë e tyre më të rejat e tyre. Fokusi në këtë ngjarje është zakonisht te telefonat inteligjentë, por vitet e fundit, ne kemi parë gjithnjë e më shumë prezantime në sektorin e tabletave dhe pajisjeve që e bëjnë shtëpinë “inteligjente”.
Vitin e kaluar gjatë MWC ne pamë për herë të parë smartphone-in me ftohje likuide nga OnePlus, OnePlus 11 Concept, apo dhe koncepte të tjera si smartphone-i me ekran të rrotullueshëm nga Motorola. Ne besojmë se edhe këtë vit mund të shfaqen produkte po kaq interesante sa vitin e kaluar.
Për sa kohë marrin pjesë kompanitë shumë të rëndësishme si Samsung, Xiaomi, Realme, Oppo, Nothing, Honor, Qualcomm, Google, Meta, AMD apo Amazon, inovacioni është pothuajse i garantuar. Dhe sigurisht Geek Room do të jetë i pranishëm aty për të informuar në kohë reale në rrjete sociale rreth teknologjive apo koncepteve më të reja që do të prezantohen në Barcelonë gjatë MWC 2024.
