Amazon po përgatitet të rikthehet në tregun e smartphone-ve për herë të parë pas më shumë se një dekade, sipas një raporti nga Reuters që citon katër burime të njohura me çështjen. Pajisja e re, e njohur brenda kompanisë me emrin e koduar “Transformer”, synon të shërbejë si një “pajisje mobile personalizimi” e integruar ngushtë me asistentin inteligjent Alexa.
Ideja kryesore e Amazon është që telefoni të lehtësojë ndërveprimin me shërbimet e saj kryesore, si blerjet online, shikimi i përmbajtjeve në Prime Video apo dëgjimi i muzikës përmes Prime Music. Inteligjenca artificiale pritet të luajë një rol qendror në funksionimin e pajisjes, megjithatë raporti thekson se Alexa mund të mos jetë “sistemi operativ kryesor”, çka lë të kuptohet se Amazon mund të mbështetet edhe në teknologji ose AI nga kompani të tjera.
Kjo nismë sjell ndër mend përpjekjen e mëparshme të Amazon me Fire Phone, i lançuar në vitin 2014 dhe i tërhequr nga tregu pas rreth një viti, për shkak të dështimit komercial. Në atë kohë, Fire Phone u fokusua te një ndërfaqe pseudo-3D, ndërsa inteligjenca artificiale ishte ende në faza shumë të hershme krahasuar me sot.
Megjithatë, konteksti aktual është ndryshe. AI ka avancuar ndjeshëm dhe ekosistemi i Amazon është shumë më i konsoliduar. Sipas Reuters, projekti është ende në faza të hershme zhvillimi dhe ekziston mundësia që të anulohet plotësisht. Aktualisht nuk ka informacion mbi datën e prezantimit, çmimin apo objektivat financiare, duke e lënë këtë iniciativë si një eksperiment ambicioz, por ende të pasigurt.
