Përdoruesit e iPhone 14 Pro dhe 14 Pro Max po raportojnë në rrjetet sociale se në ekranet e pajisjeve të tyre kanë nisur të shfaqen vija horizontale jeshile ndërkohë që e ndezin atë, dhe kërkojnë ndihmën e përdoruesve të tjerë për të kuptuar nëse ky është një fenomen i përhapur.
Përmes një thread-i në Reddit, me dhjetëra përdorues të modeleve Pro janë ankuar se në disa raste shfaqen më tepër se 1 vijë jeshile apo të verdha në ekran ndërkohë që ndezin pajisjen, të cilat më pas zhduken kur pajisja është ndezur. Disa përdorues treguan se Apple Support i ka informuar se ky nuk është një problem në hardware-in e pajisjeve, por që ka lidhje me iOS 16.
Duket se ky problem është shfaqur fill pas update-it të iOS 16.2, dhe pse përdorues të tjerë kanë treguar se kjo gjë ka ndodhur dhe në versionet e tjera të iOS 16. Një tjetër përdorues tregoi se një inxhinier në Apple i ka thënë se kompania po punon për të sjellë një software update për të rregulluar këtë problem.
Aktualisht Apple po teston iOS 16.3 me zhvilluesit dhe testuesit beta, mirëpo ky update pritet të vijë gjatë vitit të ardhshëm.