Google po përgatit ndryshime të mëdha për Android në vitin 2026, me fokus kryesor rritjen e sigurisë dhe luftën kundër malware në të gjithë ekosistemin. Sipas kompanisë, përdoruesit janë rreth 50 herë më të rrezikuar nga malware kur instalojnë aplikacione jashtë Google Play Store, krahasuar me aplikacionet brenda tij. Për këtë arsye, Google do të nisë nga shtatori kufizime të reja për sideloading, duke kërkuar që aplikacionet të vijnë vetëm nga zhvillues të verifikuar.
Presidenti i Ekosistemit Android, Sameer Samat, shpjegon se kompania ka marrë parasysh kritikat dhe ka prezantuar një mekanizëm të ri të quajtur advanced flow, i cili u lejon përdoruesve të avancuar të anashkalojnë verifikimin. Megjithatë, ky opsion është i fshehur thellë në cilësimet e zhvilluesit dhe përfshin disa hapa sigurie, përfshirë një pritje 24-orëshe, e dizenjuar për të penguar mashtrimet me presion të lartë dhe sulmet kibernetike.
Sipas rregullave të reja, zhvilluesit që shpërndajnë aplikacione jashtë Play Store duhet të identifikohen, të ngarkojnë çelësat e nënshkrimit dhe të paguajnë një tarifë prej 25 dollarësh. Aplikacionet nga zhvillues të paverifikuar nuk do të instalohen, përveç rasteve kur përdoruesi aktivizon manualisht advanced flow. Google thekson se verifikimi nuk ka të bëjë me përmbajtjen e aplikacioneve, por vetëm me identitetin e zhvilluesit, për të shmangur imitimet dhe shpërndarjen e malware-it.
Plani do të nisë fillimisht në Brazil, Singapor, Indonezi dhe Tajlandë, rajone ku mashtrimet digjitale janë më të shpeshta, përpara se të shtrihet globalisht në vitin 2026. Edhe pse ka shqetësime për privatësinë dhe zhvilluesit në vende të sanksionuara, Google këmbëngul se balanca mes lirisë së zgjedhjes dhe sigurisë është thelbësore për të ardhmen e Android, veçanërisht kur për miliarda njerëz telefoni është kompjuteri i vetëm që zotërojnë.
