Gjatë finales së Super Bowl të zhvilluar midis Kansas City Chiefs dhe San Fracisco 49ers u zhvillua si zakonisht një ndër spektaklet muzikore më të ndjekura në mbarë botën, ku performojnë artistët më të mirë ndërkombëtarë. Këtë vit të pranishëm ishin këngëtarët si Usher, Alicia Keys, Lil John, Ludacris, will.i.am, Post Malone.
Mirëpo fakti më interesant i këtij koncerti që bëhet gjatë pushimit të madh midis ndeshjes është se asnjë nga artistët nuk paguhet për këtë performancë. NFL firmos zakonisht një kontratë me sponsorët për $50 milionë, për të financuar zhvillimin e projekteve (punonjësit e përkohshëm, siguria, kërcimtarët, marketingu), por këto para nuk përdoren si pagesë për artistët. Madje shpesh herë artistët që performojnë gjatë Super Bowl halftime show shpenzojnë miliona dollarë nga ana e tyre për të bërë që performanca e tyre të jetë e paharrueshme .
Megjithatë, mos mendoni se këta artistë performojnë falas dhe shpenzojnë paratë e tyre “thjesht për të bërë një performancë të bukur”. Ndërkohë që kompani të ndryshme paguajnë $7 milionë për 30 sekonda reklamë gjatë Super Bowl, Usher dhe artistët e tjerë reklamohen falas për 13 minuta të tëra.
Gjithashtu Usher prezantoi një album të ri “Coming Home” vetëm 2 ditë pas performancës së tij në Super Bowl, duke bërë kështu që të rritet ndjeshëm numri i kopjeve të shitura si dhe do të promovohet turi i tij i ardhshëm në shtete të ndryshme.
