OpenAI prezantoi të enjten një shërbim që mund të gjenerojë video nga përshkrimet e bëra në tekst. Modeli i ri, i quajtur Sora sipas fjalës japoneze për “qiell“, mund të prodhojë video realiste deri në një minutë që i përmbahen udhëzimeve të përdoruesit si për temën ashtu edhe për stilin.
Sipas një postimi në blog të kompanisë, ky model është gjithashtu në gjendje të krijojë një video të bazuar në një imazh statik ose të zgjerojë pamjet ekzistuese me materiale të reja. “Ne po mësojmë AI të kuptojë dhe simulojë botën fizike në lëvizje, me qëllimin që modelet e trajnuara të ndihmojnë njerëzit të zgjidhin problemet që kërkojnë ndërveprim në botën reale,” shkruhet në postimin në blog.
Një video e përfshirë mes disa shembujve fillestarë nga kompania bazohej në kërkesën: “Një traileri filmi që paraqet aventurat e burrit 30-vjeçar të hapësirës, i veshur me një helmetë motorike të thurur me lesh të kuq, qiell blu, shkretëtirë kripe, stil kinematografik, xhiruar në film 35 mm, ngjyra të gjalla.”
Kompania njoftoi se kishte lejuar aksesimin në Sora për disa studiues dhe krijues video. Ekspertët do të testonin atë për të parandaluar shkeljen e kushteve të shërbimit të OpenAI, të cilat ndalojnë “dhunën ekstreme, përmbajtjen seksuale, imazhet me urrejtje, ngjashmërinë e personazheve të famshëm ose IP-në e të tjerëve”.
Kompania po lejon vetëm akses të kufizuar për studiuesit, artistët vizualë dhe krijuesit e filmave, megjithëse CEO Sam Altman iu përgjigj kërkesave të përdoruesve në X pas njoftimit me videoklipe që ai tha se ishin bërë nga Sora. Videot mbajnë një watermark për të treguar se ato janë bërë nga AI.
OpenAI nuk zbuloi se sa filmime u përdorën për të trajnuar Sora ose se cila është origjina e videove të trajnimit, përveçse i tha New York Times se përdori video që ishin të disponueshme publikisht.
