Apple është paditur nga një punonjës që akuzon kompaninë për mbikëqyrje invazive të punonjësve të saj dhe kufizim të paligjshëm të asaj që thonë për punën e tyre.
Rasti, i raportuar fillimisht nga Semafor, u depozitua të hënën në gjykatën e lartë të Qarkut Santa Clara të Kalifornisë nga Amar Bhakta, i cili punon për Apple si menaxher i operacioneve të teknologjisë së reklamave dixhitale. Bhakta pretendon se politika e Apple që kërkon që punëtorët të përdorin kompjuterët, telefonat dhe shërbimet cloud të Apple “i nënshtron punonjësit e saj ndaj mbikëqyrjes dhe ushtron kontrollin përmes monetizimit të të dhënave personale të punonjësve si kusht i punësimit të tyre“.
Shumë punonjës të Apple, përfshirë Bhakta, përdorin iPhone dhe Mac të tyre personal për punë, sipas padisë, dhe u kërkohet të instalojnë një kartë SIM elektronike ose një rrjet privat virtual që i jep Apple mundësinë për të hyrë në çdo të dhënë të ruajtur në pajisje dhe për të gjurmuar vendndodhjen në kohë reale. Apple gjithashtu kërkon që punonjësit të përdorin shërbimin e saj iCloud dhe për punonjësit që përdorin pajisjet e tyre personale, kjo do të thotë t’i jepet kompanisë qasje praktikisht të pakufizuar në retë e tyre personale, sipas padisë.
“Të dhënat mund të përfshijnë email, kontakte, reminders, biblioteka të tëra fotografish, të dhëna të shfletimit në internet, të dhëna shëndetësore, mesazhe, të dhëna të “shtëpisë inteligjente”, fjalëkalime, aplikacione, skedarë, dokumente, kalendarë, shënime dhe kopje rezervë.”
Padia thotë se politikat e Apple, përfshirë Politikën e Sjelljes së Biznesit që të gjithë të punësuarit e rinj duhet të nënshkruajnë, i lejojnë kompanisë të aksesojë, të kërkojë dhe të monitorojë të gjitha të dhënat dhe komunikimet në pajisjet e punonjësve dhe në llogaritë e tyre iCloud. Bhakta më tej pretendon se politikat e kompanisë që kufizojnë informacionin që punonjësit mund të ndajnë, duke përfshirë detaje rreth kompensimit të tyre, shkelin ligjin e punës në Kaliforni.
Ndërsa padia është e pakët në detaje në lidhje me mënyrën se si Bhakta u dëmtua nga politikat, ai thotë se atij iu mohua mundësia për të folur në mjedise publike për fushën e tij të ekspertizës, reklamat dixhitale dhe u detyrua të hiqte informacionin rreth kushteve të punës në Apple nga LinkedIn.
