Një burrë është shtypur për vdekje nga një robot në Korenë e Jugut, pasi roboti nuk arriti ta dallonte atë nga kutitë e ushqimit që po trajtonte, siç tregojnë raportimet. Incidenti ndodhi kur një burrë rreth të 40-tave, punonjës i një kompanie robotike, po inspektonte robotin.
Krahu robotik, duke e ngatërruar burrin për një kuti me perime, e kapi atë dhe e shtyu trupin e tij në rripin e transportit, duke i shtypur fytyrën dhe gjoksin, tha agjencia e lajmeve koreano-jugore Yonhap. Ai u dërgua në spital por nuk arriti dot të mbijetonte. Sipas Yonhap, roboti ishte përgjegjës për ngritjen e kutive me speca dhe transferimin e tyre në paleta.
Burri kishte kontrolluar funksionimin e sensorit të robotit përpara testimit të tij në fabrikën e klasifikimit të specave në provincën Gyeongsang, të planifikuar për në 8 nëntor, shton agjencia, duke cituar raportimin e policisë. Testi fillimisht ishte planifikuar për 6 nëntor, por u shty me dy ditë për shkak të problemeve me sensorin e robotit.
Burri, një punëtor nga kompania që prodhoi krahun robotik, po kontrollonte makinën deri në orët e vona të natës të mërkurën deri në momentin kur ajo nuk funksionoi. Në një deklaratë pas incidentit, një zyrtar nga Kompleksi Bujqësor i Eksportit Donggoseong, i cili zotëron fabrikën, bëri thirrje për krijimin e një sistemi “të saktë dhe të sigurt“.
Më herët gjatë këtij viti, një burrë nga Koreja e Jugut rreth të 50-tave pësoi lëndime të rënda pasi u bllokua nga një robot ndërsa punonte në një fabrikë të prodhimit të pjesëve të automobilave.
