Pas një ndalese pune që në mënyrë efektive ndaloi industrinë e filmit dhe televizionit të Hollywood për muaj të tërë, sindikata SAG-AFTRA njoftoi të mërkurën se kishte arritur një marrëveshje paraprake për t’i dhënë fund protestës, duke ndezur gëzim në mesin e aktorëve të shquar të Hollywood, duke përfshirë Alec Baldwin dhe Jamie Lee Curtis.
Afërsisht një muaj pasi shkrimtarët përfunduan një grevë të ngjashme, SAG-AFTRA dhe Alliance of Motion Picture and Television Producers (AMPTP) – e cila përfaqëson Walt Disney, Netflix dhe kompani të tjera mediatike – arritën një marrëveshje paraprake të mërkurën. Marrëveshja, e cila i dha fund grevës më të gjatë ndonjëherë për aktorët e filmit dhe televizionit, erdhi pasi palët kishin rifilluar bisedimet javën e kaluar pas negociatave të ngecura në fillim të tetorit. Aktorja dhe presidentja e SAG-AFTRA, Fran Drescher, postoi: “Ne ia dolëm !!!!” dhe falënderoi anëtarët e saj të sindikatës “për qëndrueshmërinë për të arritur këtë marrëveshje historike!”
Sindikata tha se kontrata e re arriti atë që aktorët kishin thënë se kishin nevojë: rritje pagash dhe mbrojtje që bënë të mundur që “anëtarët e SAG-AFTRA nga çdo kategori të ndërtonin karriera të qëndrueshme“.
Në një deklaratë publike tregohet: “Në një kontratë me vlerë mbi 1 miliard dollarë, ne kemi arritur një marrëveshje me shtrirje të jashtëzakonshme“. Ndër fitoret e sindikatës, ishin rritje më të mëdha se sa pritej në kompensimin minimal, një “bonus pjesëmarrjeje në transmetim” për herë të parë dhe “dispozita të paprecedenta për pëlqimin dhe kompensimin që do të mbrojnë anëtarët nga kërcënimi i AI“. Prodhuesit e Hollywood gjithashtu e shpallën marrëveshjen paraprake si krijimin e “një shembulli të ri” për industrinë.
Ky avancim do të thotë që Hollywood mund të nisë prodhimin e filmave për herë të parë që nga maji, pasi anëtarët e sindikatës të votojnë për të ratifikuar marrëveshjen në javët e ardhshme.
