Amerikanët duhet të mendohen dy herë për sa i përket përdorimit të një modeli kinez të AI ose investimin në një kompani të tillë në të ardhmen.
Një ligj i propozuar muajin e kaluar nga senatori Josh Hawley (R-MO), nëse miratohet me sukses nga Kongresi, do të vendosë dënime deri në 20 vjet burg ose $1 milion gjobë për shkeljen e kufizimeve të tij në tregtinë dhe bashkëpunimin e lidhur me AI. Ndërmarrjet amerikane mund të përballen me gjoba deri në $100 milionë nëse kapen duke bashkëpunuar me kompani kineze në teknologjinë e machine learning, nëse aprovohet.
Legjislacioni i propozuar, i cili theksojmë se nuk është aspak afër aprovimit, u prezantua pikërisht kur stoqet e Silicon Valley u tronditën nga prezantimi i modelit të parë arsyetues të kompanisë kineze DeepSeek, i cili jo vetëm që thuhet se është konkurrues ndaj OpenAI, por DeepSeek pretendon se e ka arritur këtë arritje me efikasitet tepër të lartë resursesh.
Tashmë drejtuesit amerikanë kuptuan se nuk mund të ndalonin zhvillimin kinez të inteligjencës artificiale përmes kufizimeve tregtare. Propozimi i Hawley, i quajtur Decoupling America’s Artificial Intelligence Capabilities from China, synon të bllokojë personat dhe subjektet amerikane nga kryerja e kërkimeve në sistemet AI të zhvilluara nga Kina, transferimin e pronës intelektuale të lidhur me AI ose investimi në firmat kineze të AI – duke vendosur gjoba të ashpra për shkelje.
Kjo përfshin ndalime jo vetëm për eksportin e infrastrukturës së AI, si gjysmëpërçuesit ose pronën intelektuale, por edhe për importin e teknologjive të AI dhe pronës intelektuale nga Kina.
Amerikanët e gjetur në shkelje të këtyre rregullave do t’i nënshtrohen gjobave siç parashikohet në seksionin 1760 të Aktit të Reformës së Kontrollit të Eksportit të vitit 2018, i cili mund të përfshijë dënime penale deri në 20 vjet burgim dhe deri në $1 milion gjoba për shkelje, përveç dënimeve civile.
Projektligji propozon gjithashtu ndëshkime për amerikanët dhe kompanitë amerikane që zbulohet se transferohen ose kryejnë kërkime në sistemet kineze të AI. Kjo do të përfshijë gjoba deri në 100 milionë dollarë së bashku me humbjen e çdo licence, kontrate, nënkontrate, granti ose përfitimi publik të dhënë më parë nga agjencitë federale. Për më tepër, oficerët dhe punonjësit e kompanive që zbulohet se janë përfshirë në këto akte do t’i nënshtrohen gjobave deri në $1 milion.
