Elon Musk ka mohuar pretendimet se Tesla është në bisedime ‘të hershme’ për të hapur një fabrikë të automjeteve elektrike në Arabinë Saudite. Një raport nga Wall Street Journal deklaroi të hënën se Arabia Saudite i ka premtuar Tesla të drejtën për të blerë sasi të caktuara të metaleve dhe mineraleve që i nevojiten kompanisë për automjetet e saj elektrike.
Një marrëveshje me sauditët mund ta ndihmojë Musk të arrijë qëllimin e tij ambicioz për të shitur 20 milionë automjete në vit deri në vitin 2030 – nga vetëm 1.3 milionë të shitura në 2022. Megjithatë, Musk iu kundërpërgjigj WSJ në X, duke postuar një pamje të artikullit me titullin: ‘Edhe një tjetër artikull krejtësisht i rremë nga WSJ’.
“Bisedimet janë në një fazë shumë të hershme dhe mund të dështojnë. Çdo marrëveshje mund të jetë e komplikuar, duke pasur parasysh marrëdhëniet e diskutueshme të shefit ekzekutiv të Tesla, Elon Musk me sauditët”, thuhet në artikull.
Raporti nga Wall Street Journal vjen vetëm disa orë pasi presidenti turk Tajip Erdogan i kërkoi Musk të ndërtonte një fabrikë automjetesh në Turqi, sipas drejtorisë së komunikimeve të vendit. Musk do të takohet gjithashtu me kryeministrin izraelit Benjamin Netanyahu në Kaliforni të hënën.
Arabia Saudite thuhet se po siguron sasi të metaleve dhe mineraleve nga vende të tjera, duke përfshirë Republikën Demokratike të Kongos. Republika Demokratike e Kongos ka minierat më të mëdha të kobaltit në botë, mirëpo punëtorët “punojnë në kushte të ngjashme me skllevër“. Ndërmjet tyre përfshihen dhe dhjetëra mijëra fëmijë që nga mosha katër vjeç.