Gjatë ditëve të fundit, fillimisht në portalin Kapitali.al dhe më pas në faqe të tjera online dhe rrjete sociale janë shpërndarë lajme që pretendojnë se Fondi Digital Europe ka pezulluar financimet për Axhendën Dixhitale. Megjithatë, këto pretendime nuk janë të vërteta dhe nuk mbështeten nga asnjë burim zyrtar i Bashkimit Evropian.
Programi Digital Europe mbetet aktiv dhe po vijon normalisht zbatimin e tij, në përputhje me objektivat strategjikë të BE-së për transformimin dixhital. As Komisioni Evropian dhe as institucionet përgjegjëse për menaxhimin e programit nuk kanë njoftuar ndonjë vendim për pezullim apo ndërprerje fondesh, qoftë në nivel europian apo për vende përfituese specifike.
Për të sqaruar më mirë spekulimet mbi këtë temë, Delegacioni i BE në Shqipëri ka dhënë një deklaratë zyrtare për Geek Room ku tregon:
Bashkimi Evropian po e ndjek situatën nga afër. Siç e kemi thënë edhe më parë, deri më sot nuk ka asnjë fond të ngrirë të BE-së.
Diskutimet me autoritetet përkatëse shqiptare mbi masat shtesë të nevojshme për të siguruar mbrojtjen e duhur të interesave financiare të BE-së janë në vazhdim.
Masat që po diskutohen lidhen si me asistencën e kaluar, ashtu edhe me mbështetjen e ardhshme, me qëllim që të sigurohet vendosja e garancive të nevojshme për çdo prokurim të ardhshëm.”
Përhapja e këtij informacioni të pasaktë ka krijuar konfuzion të panevojshëm, veçanërisht te institucionet, organizatat dhe individët që janë të përfshirë në projekte të financuara nga Digital Europe. Ekspertët theksojnë se raste të tilla nënvizojnë rëndësinë e verifikimit të lajmeve përpara se ato të shpërndahen, sidomos kur bëhet fjalë për çështje që lidhen me fonde publike dhe politika strategjike.
Burimet zyrtare mbeten referenca e vetme e besueshme për informacion mbi programet e BE-së dhe zhvillimet e tyre. Në këtë rast, mesazhi është i qartë: fondet e Digital Europe nuk janë pezulluar dhe axhenda dixhitale vijon sipas planit.
