Me ardhjen e verës, me ditët bëhen më të gjata, moti më i ngrohtë dhe njerëzit shijojnë më tepër pije freskuese në ambiente të hapura, ekspertët kanë konfirmuar se njerëzit dehen më shumë gjatë verës sesa në dimër.
Një studim nga Universiteti i Nagoya-s në Japoni zbuloi se toleranca ndaj alkoolit dhe mënyra se si trupi përpunon karbohidratet ndryshojnë sipas stinëve. Në eksperimentin me minj, ata që u rritën në kushte dimri u rikuperuan më shpejt nga dehja me alkool, duke sugjeruar se trupi dehet më lehtë gjatë verës. Kjo mund të shpjegojë pse pije verore si Aperol Spritz kanë efekt më të fortë sesa verërat e kuqe apo pijet e ngrohta të dimrit.
Studiuesit analizuan gjithashtu aktivitetin e mbi 54,000 gjeneve në 80 inde të ndryshme tek majmunët rhesus, një specie e afërt me njerëzit. Ata zbuluan se te femrat, aktiviteti gjenetik për përpunimin e karbohidrateve në duoden (pjesa e parë e zorrës së hollë) ishte më i lartë gjatë dimrit dhe pranverës. Ky ndryshim ndihmon trupin të përthithë më shumë energji kur ushqimi është më i pakët, duke shpjeguar edhe shtimin në peshë gjatë dimrit.
Rezultatet, të publikuara në Nature Communications, tregojnë se fiziologjia dhe sjellja jonë – përfshirë metabolizmin, gjumin, imunitetin dhe hormonet – janë të lidhura me ritmin e stinëve.
Në një tjetër studim, Universiteti i Exeter-it filmoi shimpanze të egër duke ngrënë dhe ndarë fruta të fermentuara me përmbajtje alkooli. Kjo sugjeron se, ashtu si te njerëzit, alkooli mund të forcojë lidhjet sociale edhe tek shimpanzetë. Tek njerëzit, alkooli çliron dopaminë dhe endorfina, duke sjellë ndjesi lumturie dhe relaksi, veçanërisht kur konsumohet në shoqëri.
Pra, arsyeja pse njerëzit pinë më shumë dhe dehen më lehtë në verë lidhet si me biologjinë sezonale, ashtu edhe me natyrën tonë sociale.
