Përmes një postimi në Facebook, Blendi Gonxhja, Drejtor i Përgjithshëm i Drejtorisë së Përgjithshme të Shërbimeve të Transportit Rrugor (DPSHTRR), tregoi se brenda këtij muaji do të nisë shërbimi i ri i personalizimit të targave të makinave.
Sigurisht për të bërë tuajën një targë të tillë do të duhet të paguani një tarifë speciale, dhe do të mund të zgjidhni kombinime me 5 deri në 7 karaktere, që duhet të përfshijnë me patjetër të paktën 2 numra apo 2 gërma. Në postimin e tij në Facebook Gonxhja publikoi dhe disa fotografi me modele të targave, ku mund të lexohen “T1RONC1”, “LU4N4”, “ALB4NI4”, “N00IZY” apo “D4NOC17”.
Pasi ju të keni supozuar një opsion të caktuar për personalizimin e targës, do të duhet të prisni dhe aprovimin nga DPSHTRR, pasi fjalët jo të përshtatshme do të çensurohen. Kombinimet e rralla apo unike që kanë interes të gjerë (kombinimet me 4 karaktere e poshtë dhe me vetëm numra apo gërma, fjalë/emra të plota, me prokate të veçanta do të jenë vetëm me ankand publik e transparent, për maksimizim vlere), do të shiten nëpërmjet një ankandi periodik që do të zhvillohet nga DPSHTRR.
Të ardhurat e përfituara nga ky shërbim do të përdoren për modernizimin e infrastrukturës dhe sistemeve të transportit rrugor, projekte edukuese mbi sigurinë rrugore, aktivitetet Retro si dhe për shërbime të tjera.
Ky shërbim i ri shoqërohet me të drejtën e blerësit që ta mbartë këtë targë te një mjet tjetër, më të ri, kundrejt tarifës përkatëse të transferimit.
