Apple ka hequr dorë nga “Project Titan“, një projekt disa vjeçar që lidhej me zhvillimin e një makine elektrike. Kompania thuhet se njoftoi punonjësit të martën dhe tha se shumë njerëz në ekipin prej 2,000 personash pas makinës do të transferohen në sektorin e AI.
Ishin drejtuesit e lartë në Apple, Jeff Williams dhe Kevin Lynch që informuan punonjësit për ndërprerjen e projektit, raporton Bloomberg. Mundet të ketë edhe pushime nga puna, por nuk është e qartë se sa punëtorë do të preken. Përpjekjet e Apple për të ndërtuar makinën e saj elektrike janë përfolur për vite me radhë dhe raportet e fundit sugjeruan se Apple ishte ende duke punuar për këtë projekt. Në fillim të këtij muaji, Wired raportoi se Apple kishte testuar teknologjinë e drejtimit autonom që kishte zhvilluar për mbi 7,200 km në vitin 2023, ndërsa Bloomberg tha në janar se Apple e shtyu lançimin e makinës në vitin 2028.
Ndërkohë, raporte të tjera sugjeruan se makina, e cila u përfol se do të ofrohej për një çmim nën $100,000, nuk do të vinte me aftësitë e avancuara vetëdrejtuese që kompania fillimisht shpresonte. Zhvendosja e burimeve të saj drejt sektorit të AI mund të ketë kuptim për Apple, pasi thuhet se po shpenzon miliona dollarë në ditë për të trajnuar një model të vetën të AI, të quajtur Ajax.
CEO i Apple, Tim Cook gjithashtu konfirmoi kohët e fundit se Apple po lançon shërbime të inteligjencës artificiale gjeneruese “më vonë gjatë këtij viti“, ndërsa thashethemet tregojnë se kompania po teston përditësimet e AI për Spotlight dhe Xcode.
