Apple po planifikon të shpenzojë $1 miliard në vit për zhvillimin e produkteve të saj gjeneruese të inteligjencës artificiale, raportoi Bloomberg. Sipas raportit të publikuar të dielën, shpenzimet vijnë pasi kompania po kërkon të arrijë nivelin e disa konkurrentëve që kanë debutuar tashmë produkte dhe shërbime të reja të AI, si Google, Microsoft dhe Amazon.
Apple përdor AI në produktet e saj, por nuk ka lançuar një produkt gjenerues të AI të ngjashëm me ChatGPT të OpenAI ose Google Bard. Në vend të kësaj, AI i Apple përdoret për gjëra të tilla si përmirësimi i fotove dhe korrigjimi automatik i tekstit. Deri më tani, Apple ka ndërtuar modelin e vet të madh të gjuhës, ose LLM, të njohur si Ajax, si dhe një chatbot, që brenda kompanisë cilësohet si Apple GPT.
Asnjë prej këtyre sistemeve nuk është përfshirë ende në produktet e Apple. Kompania thuhet se po kërkon të integrojë AI në Siri, Messages dhe Apple Music. Për këtë të fundit, Apple do të përdorte AI për të krijuar lista të ndryshme me këngë që gjenerohen automatikisht siç bën Spotify përmes partneritetit që ka me OpenAI.
Kompania po eksploron gjithashtu përdorimin e AI në Xcode për të ndihmuar zhvilluesit e aplikacioneve, sipas raportit. Drejtuesit e Apple që udhëheqin iniciativat e AI janë John Giannandrea, Craig Federighi, dhe Eddy Cue, kreu i shërbimeve.
