Google njoftoi të enjten se “do të nisë masakrën e shumëpritur” të cookies në internet duke filluar nga 4 janari, kur do t’i bllokojë ato për 1% të përdoruesve të Chrome, ose rreth 30 milionë njerëz. Është hapi i parë i madh në projektin e tij Privacy Sandbox, i cili synon të zëvendësojë cookies me një lloj tjetër gjurmimi që Google thotë se është më i mirë për privatësinë tuaj.
Për 30 vitet e fundit, faqet e internetit dhe kompanitë e teknologjisë kanë përdorur të ashtuquajturat “cookie të palëve të treta” si mënyra kryesore për të gjurmuar klientët në internet. Këto cookie i lejojnë faqet e internetit të bashkëpunojnë me kompani të tjera, duke përfshirë Google dhe shumë të tjera, për të kontrolluar gjithçka që bëni në internet.
Kjo është e mrekullueshme për kompanitë dhe e tmerrshme për privatësinë tuaj, sepse do të thotë se ka shumë biznese që mbajnë një histori të të gjithë shfletimit tuaj në web. Në vend të cookies, Google ka prezantuar një grup të ri mjetesh që e bëjnë vetë Chrome të monitorojë atë që po bëni në internet. Në thelb, ato të dhëna qëndrojnë në pajisjen tuaj dhe shfletuesi juaj ju rendit në kategori të ndryshme, ose “Ad Topics” siç i quan Google, si përshembull “Adhurues yoga” ose “Konservator i ri“.
Website-t mund të pyesin Chrome në cilat kategori jeni, por ata nuk do të jenë në gjendje të kuptojnë saktësisht se kush jeni (të paktën duke mos përdorur cookie, ka teknika të tjera më pak të njohura). Pra, Chrome është ende duke ju gjurmuar dhe e bën atë në një mënyrë që konkurrentët si Firefox dhe Safari nuk e bëjnë.
