X i Elon Musk po padit një grup kompanish të mëdha, me pretendimet se ata komplotuan në mënyrë të paligjshme për të bojkotuar platformën.
X akuzon gjigantët e ushqimit Unilever dhe Mars, kompaninë private të kujdesit shëndetësor CVS Health dhe firmën e energjisë së rinovueshme Orsted – së bashku me një shoqatë tregtare të quajtur Federata Botërore e Reklamuesve (WFA) – se e kanë privuar atë nga “miliarda dollarë” të ardhura të gjeneruara nga reklamat.
Padia lidhet me periudhën në vitin 2022 menjëherë pasi Musk bleu X, të njohur në atë kohë si Twitter, kur të ardhurat nga reklamat ranë ndjeshëm. Disa kompani vendosën të postonin gjithmonë e më pak reklama në platformë pas shqetësimeve se pronari i saj i ri nuk ishte mjaft serioz për heqjen e përmbajtjeve të dëmshme në internet.
Duke bërë këtë, X pretendon se kompanitë vepruan kundër interesave vetjake të tyre ekonomike në një komplot kundër platformës që shkeli ligjin antitrust ose atë të konkurrencës në SHBA. Bill Baer, i cili ishte ndihmës i prokurorit të përgjithshëm në divizionin antitrust të Departamentit të Drejtësisë nën drejtimin e Barack Obama, tha se padia nuk kishte gjasa të kishte sukses.
Shefja ekzekutive e X Linda Yaccarino tha se “njerëzit lëndohen kur tregu i ideve është i kufizuar. Asnjë grup i vogël njerëzish nuk duhet të monopolizojë atë që fitohet para“. Musk shkroi në X: “Ne u përpoqëm të jemi të mirë për 2 vjet dhe nuk morëm gjë tjetër veç fjalëve boshe. Tani, do të luftojmë“.
