Aplikacioni i inteligjencës artificiale Claude, i krijuar ngaAnthropic, arriti vendin e parë në renditjen e aplikacioneve falas në SHBA në App Store, vetëm një ditë pasi administrata Trump kërkoi të bllokonte përdorimin e teknologjisë së startup-it nga agjencitë qeveritare amerikane. Kjo rritje e menjëhershme tregon se Anthropic po përfiton nga vëmendja mediatike, veçanërisht pas qëndrimit të saj për të mos lejuar përdorimin e modeleve AI për mbikëqyrje masive të qytetarëve apo krijimin e armëve plotësisht autonome.
Presidenti Donald Trump reagoi ashpër në Truth Social, duke kritikuar Anthropic për përpjekje, sipas tij, për të imponuar kushtet e shërbimit mbi institucionet shtetërore. Ndërkohë, Sekretari i Mbrojtjes Pete Hegseth kërkoi që Anthropic të etiketohej si rrezik për sigurinë kombëtare në zinxhirin e furnizimit, çka do të ndalonte kontraktorët ushtarakë amerikanë nga përdorimi i teknologjisë së saj.
CEO i kompanisë, Dario Amodei, u shpreh se ndonëse Departamenti i Mbrojtjes ka të drejtë të zgjedhë partnerët e vet, ai shpreson për rishqyrtim duke pasur parasysh vlerën që teknologjia e Anthropic sjell për forcat e armatosura.
Historikisht, aplikacionet e tjera të AI kanë qenë më të njohura. OpenAI me ChatGPT renditej i dyti, ndërsa Google Gemini i katërti. Sipas të dhënave nga Sensor Toëer, Claude u rrit nga vendi 131 në fund të janarit në top-20 gjatë shkurtit. Anthropic raportoi rritje mbi 60% të përdoruesve falas që nga janari dhe dyfishim të abonentëve me pagesë këtë vit.
Interesi publik u rrit edhe më tej kur këngëtarja Katy Perry postoi një screenshot të abonimit Pro të Claude, duke simbolizuar mbështetje të hapur për platformën.
