Xiaomi prezantoi një seri pajisjesh të reja përpara Mobile World Congress në Barcelonë, ku Geek Room dhe Neptun do të jenë të pranishëm për të informuar ndjekësit rreth të rejave më të fundit nga bota e teknologjisë. Produkti kryesor i prezantimit ishte smartphone-i flagship Xiaomi 17 Ultra, i zhvilluar në bashkëpunim me prodhuesin legjendar të kamerave Leica.
Xiaomi 17 Ultra përdor lente Leica dhe filtra fotografikë të frymëzuar nga estetika klasike e kompanisë gjermane. Telefoni përmban një kamerë kryesore 50 MP me sensor 1-inç dhe hapje f/1.67, por veçoria më mbresëlënëse është kamera telefoto 200 MP me gjatësi fokale të ndryshueshme 75–100 mm, që ofron zmadhim optik nga 3.2x deri në 4.3x. Seti i kamerave plotësohet me atë ultra-wide 50 MP. Pajisja ka një bateri 6,000 mAh (6,800 mAh në versionin kinez), karikim të shpejtë 90W dhe karikim wireless 50W me teknologjinë HyperCharge.
Smartphone-i vjen me ekran 6.9 inç HyperRGB OLED, i mbrojtur nga Shield Glass 3.0, dhe fuqizohet nga procesori Qualcomm Snapdragon 8 Elite Gen 5, i përdorur edhe në serinë Galaxy S26. Xiaomi prezantoi gjithashtu një edicion special Leica për 100-vjetorin e kompanisë, me trup alumini, unazë rrotulluese për zmadhim dhe “Leica Essential Mode”, që simulon stilin e kamerave Leica M9 dhe M3.
Krahas kësaj, u lançua edhe Xiaomi 17, me bateri më të madhe 6,330 mAh dhe karikim 100W. Për entuziastët e fotografisë, kompania prezantoi dy aksesorë profesionalë fotografikë për 17 Ultra, përfshirë versione me butona fizikë, kontroll zmadhimi dhe bateri të integruar.
Produktet do të jenë të disponueshme në BE dhe MB, me çmime që nisin nga €999 për Xiaomi 17 dhe arrijnë deri në €1,999 për edicionin Leica. Përveç telefonave, Xiaomi prezantoi edhe Electric Scooter 6 Ultra, me fuqi 1200W, autonomi deri në 75 km dhe çmime nga €329.99 deri në €799.99, duke forcuar më tej pozicionin e saj si prodhues i kompletuar i teknologjisë së konsumit.
