WhatsApp do të ofrojë një shërbim të ri të Voice Chat të ngjashëm me Discord për grupet e mëdha, siç bëhet e ditur nga kompania ditën e hënë.
Shërbimi i ri është krijuar për të qenë më pak i bezdisshëm sesa një thirrje në grup, në të cilën çdo anëtar në një grup njoftohet përmes ziles. Bisedat zanore nisen në heshtje, pa i rënë ziles së përdoruesve të përfshirë në grup, thjesht duke shfaqur një flluskë në bisedë që ju mund ta prekni për t’u bashkuar.
Shërbimi ju lejon të flisni me këdo që mund të bashkohet, ndërsa ju lejon të vazhdoni të dërgoni mesazhe drejt personave që nuk munden të jenë pjesë e Voice Chat. Ju mund të bëni unmute mikrofonin tuaj, ta mbyllni atë ose t’i dërgoni mesazh grupit pa pasur nevojë të largoheni nga biseda zanore duke klikuar në kontrollet e telefonatës në krye të bisedës.
Kompania po shpërndan bisedat zanore globalisht për grupet e mëdha gjatë javëve të ardhshme, duke filluar me ato që kanë 33 persona ose më shumë. WhatsApp vë në dukje se mbron bisedat zanore me enkriptim end-to-end. Bisedat zanore në WhatsApp në thelb funksionojnë njësoj si funksionet e ngjashme në Discord, Telegram dhe Slack, pasi ato lejojnë grupe të mëdha njerëzish të lidhen përmes një bisede të folur.
Lançimi i shërbimit të ri nuk është saktësisht befasi, pasi WABetaInfo raportoi në gusht se WhatsApp po testonte bisedat zanore në një version beta. Ky prezantim vjen gjithashtu disa javë pasi CEO i Meta Mark Zuckerberg ndau gjatë mbledhjes për performancën e kompanisë në tremujorin e tretë se përdoruesit dhe bizneset po ndërveprojnë më shumë se 600 milionë herë në ditë në platformat e saj.
