Të gjithë e dimë se marrëdhëniet mund të jenë të ndërlikuara, por pak janë aq të ndërlikuara sa ajo midis Apple dhe Google. Reklama e re e Apple sulmon sigurinë e Google, me një mesazh të qartë për 1.4 miliardë përdoruesit e saj, ndaloni së përdoruri Chrome në iPhone tuaj.
Google është në një mision për të kthyer përdoruesit e Safari në përdorues të Chrome. Aktualisht kompania mbështetet në ndihmën e Safari për të qenë motori i përzgjedhur i kërkimit në iPhone, gjë që është bërë e mundur përmes një marrëveshje financiare mes dy kompanive (Google paguan rreth $20 miliardë në vit). Por kjo marrëveshje së shpejti mund të kufizohet nga hetimet e rregullatorëve për shkak të monopolit të krijuar në SHBA dhe Evropë.
Dhe kështu Google po avancon Planin B. Chrome është i instaluar në vetëm 30% të iPhone –ve – objektivi i Google është ta rrisë këtë në 50%, duke sjellë 300 milionë përdorues të tjerë të iPhone brenda këtij grupi. Apple padyshim dëshiron ta ndalojë këtë gjë, dhe ka ndërmarrë fushata të ndryshme reklamuese për t’ia arritur qëllimit.
Midis tyre, Safari dhe Chrome gëzojnë një pjesë më të madhe se 90% të tregut në pajisjet celulare. Privatësia është “thembra e Akilit” të Chrome. Google prezantoi planin për të eleminuar përdorimin e cookies, megjithatë plani është shtyrë për një moment të dytë pas problemeve me rregullatorët.
Për të paralajmëruar përdoruesit për sa i përket privatësisë, kompania ka realizuar një reklamë të inspiruar nga filmi “The Birds” i Hitchcock-ut. Është i fuqishëm, i paharrueshëm dhe mesazhi i tij është i qartë.
Nëse nuk dëshironi që aktiviteti jua në internet të mbikëqyret, përdorni Safari, sepse sipas Apple privatësia në Safari është shumë më e përparuar se në browser-at e tjerë.
