Një studim i ri sugjeron se aroma e çokollatës së zezë mund të jetë një “sekret” i pazakontë për të përmirësuar performancën në palestër. Sipas kërkuesve nga Universiteti i Malaya, nuhatja e çokollatës së zezë pak para ushtrimeve me pesha i ndihmoi pjesëmarrësit të kryenin dukshëm më shumë përsëritje, pa e perceptuar stërvitjen si më të lodhshme.
Studimi, i publikuar në revistën Frontiers in Physiology, përfshiu 23 burra të shëndetshëm në të njëzetat, të cilët u ndanë në tre grupe. Secili grup nuhati një mostër me aromë çokollate të zezë me 90% kakao, çokollate qumështi me 60% kakao ose ujë, që shërbeu si grup kontrolli. Të gjithë pjesëmarrësit kishin agjëruar për rreth 10 orë përpara eksperimentit.
Më pas ata kryen ushtrime për këmbët në seri prej 10 përsëritjesh. Rezultatet treguan se ata që nuhatën çokollatën e zezë realizuan mesatarisht rreth 18 përsëritje më shumë sesa grupi kontroll, ndërsa aroma e çokollatës me qumësht solli një përmirësim prej rreth 9 përsëritjesh.
Sipas studiuesve, aroma e çokollatës duket se ndikon në perceptimin e urisë. Pjesëmarrësit raportuan se ndiheshin më të ngopur, kishin më pak dëshirë për të ngrënë dhe nuk e konsideronin stërvitjen më të vështirë, pavarësisht se kryenin më shumë ushtrime.
Ekspertët besojnë se truri krijon një reagim të mësuar ndaj aromës së çokollatës. Veçanërisht aroma e çokollatës së zezë lidhet me një ushqim të pasur dhe ngopës, duke “mashtruar” organizmin që të ndiejë ngopje edhe pa konsumuar ushqim.
Megjithatë, studiuesit theksojnë se nevojiten kërkime të mëtejshme për të konfirmuar rezultatet dhe për të parë nëse aroma e ushqimeve të tjera mund të ketë një efekt të ngjashëm në performancën fizike. Nëse gjetjet konfirmohen, një aromë e këndshme mund të bëhet një mënyrë e thjeshtë dhe pa kosto për të rritur efikasitetin e stërvitjes.
