Jeff Bezos mendon e ardhmja e modës nuk do të mbështetet më në materiale si pambuku apo poliesteri, por nga laboratorët. Përmes Bezos Earth Fund, Bezos dhe Lauren Sánchez Bezos kanë investuar $34 milionë në zhvillimin e tekstileve të gjeneratës së ardhshme si fibrat e biodegradueshme, mëndafshi sintetik pa plastikë dhe materiale të rritura nga baktere apo mbetje bujqësore.
Lëvizja shënon një kthesë të rëndësishme për fondin, i cili deri tani ishte fokusuar kryesisht në ruajtjen e natyrës. Tani, vëmendja po zhvendoset drejt industrisë së modës, një nga sektorët më ndotës në botë dhe shumë i varur nga lëndët djegëse fosile. Sot, materiale si poliesteri prodhohen nga nafta dhe qymyri pasi janë të lira dhe të qëndrueshme, por jo të biodegradueshme, çlirojnë mikroplastikë dhe kimikate të dëmshme në ujëra.
Sipas fondit, zgjidhja nuk është vetëm “modë më e gjelbër”, por një rishpikje e plotë e asaj se nga çfarë përbëhen rrobat në nivel molekular. Grantet po mbështesin universitete si Columbia, UC Berkeley dhe Clemson, ku studiuesit po eksperimentojnë me fibra të rritura nga baktere që ushqehen me mbetje bujqësore, një alternativë që mund të ulë ndjeshëm përdorimin e naftës dhe ujit.
Megjithatë, sfida më e madhe mbetet shkallëzimi. Tekstilet e qëndrueshme janë ende të shtrenjta për t’u prodhuar dhe shumë startup-e në këtë fushë kanë dështuar për shkak të mungesës së fondeve dhe lidhjeve me industrinë. Edhe kur alternativat ekzistojnë, markat dhe konsumatorët shpesh zgjedhin materialet tradicionale më të lira.
Fondi shpreson që disa prej këtyre materialeve të arrijnë te konsumatorët brenda 3–5 viteve, por transformimi i një zinxhiri global të ndërtuar mbi sintetikë të lirë nuk do të jetë i shpejtë. Ironikisht, Bezos mbetet themeluesi i Amazon, një nga shitësit më të mëdhenj të veshjeve në botë dhe shpesh objekt kritikash për gjurmën e saj klimatike.
