Gjatë kohëve të fundit po mbështeten gjithnjë e më tepër mundësitë e përdorimit të energjisë së rinovueshme, dhe ideja më e re është përdorimi i paneleve fotovoltaike në vend të asfaltit në rrugë, të cilët po mbështeten nga shtete si SHBA, Gjermania, Zvicra dhe Franca.
Një nga zgjidhjet më të njohura është Wattway, e zhvilluar nga Colas në bashkëpunim me French National Institute of Solar Energy dhe laboratorë të CEA-Liten. Panelet Wattway instalohen direkt mbi asfaltin ekzistues dhe janë projektuar të përballojnë presionin e gomave, lagështinë, papastërtitë dhe ndryshimet ekstreme të temperaturës, duke ruajtur një nivel të pranueshëm sigurie për mjetet dhe këmbësorët.
Eksperimenti më i famshëm në shkallë reale u zhvillua në Normandi, Francë, ku në vitin 2016 u inaugurua një segment 1 km i rrugës RD5 me 2,800 m² panele diellore. Edhe pse projekti synonte të prodhonte rreth 280,000 kWh në vit, rezultatet reale dolën më të ulëta, me degradim të moduleve dhe prodhim energjie nën pritshmëri. Kjo tregoi se zëvendësimi masiv i asfaltit me panele diellore mbetet problematik.
Në Shtetet e Bashkuara, një instalim pilot në Georgia, në kushte më të kontrolluara, tregoi përmirësime teknike dhe rritje performance, duke e zhvendosur fokusin e teknologjisë drejt parkingjeve, zonave me shpejtësi të ulët, porteve dhe hapësirave urbane. Edhe certifikimet ndërkombëtare të marra në vitin 2024 rrisin besueshmërinë teknike, por nuk e zgjidhin çështjen e rendimentit dhe kostos.
Sot, asfalti diellor shihet më shumë si një zgjidhje e specializuar për gjenerim dhe konsum lokal, sesa si zëvendësim i gjerë i rrugëve tradicionale. Teknologjia ka potencial, por kërkon ende prova të forta ekonomike dhe operacionale përpara se të bëhet pjesë e zakonshme e infrastrukturës rrugore.
