Samsung mund të sjellë një ndryshim të rëndësishëm në linjën e saj flagship duke kaluar nga tre në katër modele Galaxy S vitin e ardhshëm. Sipas raportimeve të fundit, kompania po shqyrton prezantimin e një modeli të ri “Pro”, jo si rikthim i linjës Edge, por si një alternativë kompakte me specifika të nivelit të lartë.
Burimet sugjerojnë se modeli i ri, i quajtur potencialisht Galaxy S27 Pro, do të ketë një ekran rreth 6.47 inç, vetëm pak më i madh se modeli bazë dhe ndjeshëm më i vogël se variantet Plus dhe Ultra.
Samsung ka menduar që të ofrojë në Galaxy S27 Pro një telefon relativisht kompakt, por me specifika premium. Sipas thashethemeve, ai do të ofrojë performancë dhe veçori të krahasueshme me modelin Ultra, por pa mbështetjen për S Pen. Kjo e pozicionon si zgjedhje ideale për përdoruesit që kërkojnë fuqi maksimale, kamera të avancuara dhe cilësi të lartë, pa pasur nevojë për një pajisje shumë të madhe.
Një qasje e tillë do ta vendoste Samsung-un në konkurrencë më të drejtpërdrejtë me Apple dhe modelet e saj Pro, veçanërisht iPhone 17 Pro, që deri tani mungonte në këtë seri.
Reagimet e para online kanë qenë kryesisht pozitive, me shumë përdorues që e shohin Galaxy S27 Pro si “telefonin ideal”. Megjithatë, gjithçka mbetet ende në nivel thashethemesh. Nëse modeli ekziston vërtet, pritet të prezantohet në fillim të vitit 2027, së bashku me gjithë familjen Galaxy S27.
