Pajisjet e reja palosshme nga Samsung duket se janë shumë pranë prezantimit. Nëse raportimet më të reja janë të vërteta, ne mund të njohim të gjitha specifikat e këtyre smartphone-ve gjatë prezantimit që do të bëhet në muajin korrik, së bashku me Watch 6 dhe Tab S9.
Një ndër shërbimet më të pritura nga përdoruesit që do të vijë në Galaxy Z Flip 5 është ekrani i jashtëm me përmasa më të mëdha. Përmes renders të ndryshëm ne kemi parë se sa shumë mund të përmirësohet ky ekran, mirëpo tashmë një gjë e tillë është konfirmuar dhe nga kasat mbrojtëse të cilat janë prodhuar që para se smartphone-i të lançohet.
Gjithashtu nëpërmjet kasave konfirmohet dhe dizajni i jashtëm që është i ngjashëm me pajisjet e gjeneratave të kaluara. Me aq informacione sa janë publikuar deri më tani, ky ekran i jashtëm besohet se do të ketë madhësi 3.4” si dhe do të ofrojë një rezolucion 720×748 pixels. Pra, ju do ta keni shumë më të lehtë të kontrolloni njoftimet, orën, apo parashikimin e motit në këto pajisje, krahasuar me ekranin 1.9” që gjendej në gjeneratat e mëparshme.
Megjithatë ka ende shumë informacione të tjera për të mësuar rreth hardware-it të Galaxy Z Flip 5. Teknologjia e re e përdorur në mekanizmin mbyllës mund të sigurojë një palosje me shumë pak hapësirë midis ekraneve ose aspak.
