Evropa po i afrohet një momenti historik në financat dixhitale. Komiteti për Çështjet Ekonomike dhe Monetare i Parlementit Evropian ka miratuar krijimin e euros dixhitale, me 43 vota pro dhe 14 kundër, duke hapur rrugën për versionin elektronik të monedhës evropiane.
Qëllimi është i qartë, pagesa më të shpejta, më të sigurta dhe më private në të gjithë eurozonën, si dhe një reduktim i varësisë nga gjigantët amerikanë të pagesave si Visa dhe Mastercard. Në praktikë, euroja dixhitale do të funksionojë si online ashtu edhe offline. Pagesat online do të realizohen përmes një sistemi të bazuar në llogari, ndërsa ato offline do të sillen më shumë si cash-i klasik, duke u kryer direkt mes pajisjeve, si smartphone-ët, pa pasur nevojë për lidhje interneti.
Një nga pikat më të forta të projektit është privatësia. Bashkimi Evropian thekson se euroja dixhitale do të përdorë teknologji kriptimi dhe mekanizma si “zero-knowledge proofs”, të cilat lejojnë verifikimin e transaksioneve pa zbuluar të dhëna personale, as për tregtarët, as për European Central Bank dhe as për institucionet shtetërore.
Të gjitha bizneset që operojnë në BE do të jenë të detyruara ta pranojnë euron dixhitale, me përjashtim të mikro-ndërmarrjeve që nuk ofrojnë ende pagesa dixhitale. Për konsumatorët, përdorimi do të jetë falas, ndërsa tregtarët do të paguajnë tarifa për çdo transaksion, më të ulëta se komisionet aktuale të Visa dhe Mastercard.
Edhe turistët jashtë eurozonës do të mund ta përdorin euron dixhitale gjatë udhëtimeve në Evropë, duke e kthyer atë në një mjet pagesash vërtet universal.
Miratimi formal pritet në një votim plenar në Strasburg muajin e ardhshëm. Më pas, ECB do të nisë negociatat me 27 shtetet anëtare, me synimin për konsensus deri në fund të vitit. Një pilot 12-mujor është planifikuar për gjysmën e dytë të vitit 2027, ndërsa lançimi zyrtar pritet në 2029.
