Shkencëtarët kanë lëshuar një paralajmërim urgjent lidhur me flokët artificialë, pasi një studim i ri ka zbuluar se ato përmbajnë dhjetëra kimikate të rrezikshme për shëndetin. Këto produkte, të preferuara edhe nga figura publike si Taylor Swift, Ivanka Trump dhe Elle Macpherson, përdoren për t’i dhënë flokëve pamje më të dendur dhe më të gjatë, por rreziqet e tyre kanë qenë deri tani pak të studiuara.
Ekspertët nga Silent Spring Institute analizuan 43 produkte të njohura të shitura online dhe në dyqane kozmetike, përfshirë extensions sintetike dhe ato me bazë biologjike (flokë njerëzorë, banane apo mëndafsh). Ata zbuluan se pothuajse të gjitha mostrat përmbanin kimikate shqetësuese, si ftalate, pesticide, stiren, tetrakloroetan dhe organotinë.
Sipas autores kryesore të studimit, Dr Elissia Franklin, kompanitë rrallë i deklarojnë kimikatet e përdorura, duke i lënë konsumatorët të painformuar për rreziqet nga përdorimi afatgjatë. Extensions qëndrojnë drejtpërdrejt në skalp dhe qafë dhe, kur ngrohen apo stilohen, mund të çlirojnë substanca që thithen përmes ajrit ose lëkurës. Shumë nga këto kimikate janë të lidhura me kancer, çrregullime hormonale, probleme zhvillimore dhe dëmtime të sistemit imunitar.
Bazuar në këto gjetje, studiuesit kërkojnë rregullim më të fortë dhe mbikëqyrje më të rreptë të tregut të extensions, për të mbrojtur konsumatorët dhe për të nxitur prodhimin e alternativave më të sigurta. Paralajmërimi vjen në një moment kur edhe produkte të tjera të kujdesit personal po analizohen për përbërës potencialisht kancerogjenë, duke ngritur shqetësime më të gjera për sigurinë e industrisë kozmetike.
